НИЙГМИЙН ДААТГАЛЫН ЦАХИМ ҮЙЛЧИЛГЭЭГ ӨРГӨЖҮҮЛЭХ ТАЛААР САНАЛ СОЛИЛЦЛОО
Засгийн газрын Хэрэг эрхлэх газрын Тэргүүн дэд даргын тушаалаар байгуулагдсан Хэрэг эрхлэх газрын Дэд дарга С.Тэнгисээр ахлуулсан ажлын хэсэг 2026 оны 10 дугаар сарын 08-ны өдөр Нийгмийн даатгалын ерөнхий газарт ажиллаж, Нийгмийн даатгалын байгууллагын үйл ажиллагаа, цахимжилтын өнөөгийн нөхцөл байдалтай танилцлаа.
Уулзалтын үеэр Нийгмийн даатгалын ерөнхий газрын дарга Б.Батжаргал Нийгмийн даатгалын байгууллагын үйл ажиллагаа, бодлогын хэрэгжилт болон цахим шилжилт, үйлчилгээний талаар танилцуулга хийлээ.
Монгол Улсын Ерөнхий сайдын санаачилсан “Чөлөөлье” үндэсний санаачлагыг нийгмийн даатгалын салбарын хэмжээнд хэрэгжүүлэх, цаашид салбарын цахим үйлчилгээг өргөжүүлэх, иргэн, хуулийн этгээдээс цаасан баримт болон төрд байгаа мэдээллийг дахин шаардахгүй байх тал дээр анхаарч, шийдвэрлэх асуудлуудын талаар талууд санал солилцож, зарим асуудлуудыг бусад төрийн байгууллагуудтай хамтран шийдвэрлэхээр тохиролцлоо.
Тус уулзалтад Засгийн газрын Хэрэг эрхлэх газар, Гэр бүл, хөдөлмөр нийгмийн хамгааллын яам, Нийгмийн даатгалын ерөнхий газар, Төрийн цахим үйлчилгээний зохицуулалтын газар, “И-Монгол академи” улсын төсөвт үйлдвэрийн газар, “Санхүүгийн мэдээллийн технологийн төв” улсын төсөвт үйлдвэрийн газрын төлөөллүүд оролцлоо.
