ЯПОНЫ АТОМЫН ЭНЕРГИЙН АГЕНТЛАГТАЙ УДИРДАХ ХОРООНЫ УУЛЗАЛТЫГ ЗОХИОН БАЙГУУЛЛАА
Монгол Улсын Цөмийн энергийн комиссын Ажлын алба болон Японы Атомын Энергийн Агентлаг (ЯАЭА) хоорондын хамтын ажиллагааны хүрээнд Удирдах хорооны ээлжит уулзалтыг 2026 оны 09 дүгээр сарын 28-29-ний өдрүүдэд Улаанбаатар хотноо зохион байгууллаа.
Уулзалтаар талуудын хамтын ажиллагааны хүрээнд хэрэгжүүлж буй арга хэмжээний үр дүнг хэлэлцэж, цаашдын хамтын ажиллагаа болон хүний нөөцийн чадавхыг бэхжүүлэх чиглэлээр санал солилцов.
Уулзалтын үеэр ЯАЭА-ийн талаас “Япон Улсын цөмийн эрчим хүчний ашиглалтын өнөөгийн байдал”, мөн “Сургагч багш бэлтгэх хөтөлбөр”-ийн хэрэгжилтийн талаар, Монголын талаас “Монгол Улсын цөмийн энергийн салбарын бодлого, үйл ажиллагаа”, “Монгол Улсын цөмийн салбарын хүний нөөцийн хөгжил” сэдвээр тус тус танилцуулж, мэдээлэл солилцов.
ЯАЭА-ийн “Сургагч багш бэлтгэх хөтөлбөр”-ийн хүрээнд 2012 оноос хойш “Реакторын инженерчлэл”, “Цөмийн болон цацрагийн ослын үеийн бэлэн байдал”, “Гадаад орчны цацрагийн хяналт” чиглэлийн сургалтад Монгол Улсаас давхардсан тоогоор 57 албан хаагч хамрагдан сургагч багшаар бэлтгэгдсэн бөгөөд тэдгээрийн оролцоотойгоор 2013 оноос хойш Монгол Улсад зохион байгуулсан дагалдах сургалтад төрийн болон төрийн бус байгууллага, аж ахуйн нэгжийн 743 албан хаагч хамрагджээ. Мөн 2010 оноос хойш цөмийн энергийн салбарын мэргэжилтэн, судлаачид, багш нарт зориулсан цөмийн технологийн семинаруудад давхардсан тоогоор 79 албан хаагч хамрагджээ.
Мөн уулзалтын үеэр дагалдах сургалтын зохицуулагчид 2025-2026 онд реакторын инженерчлэл, цөмийн болон цацрагийн ослын үеийн бэлэн байдал, гадаад орчны цацрагийн хяналт чиглэлээр зохион байгуулсан сургалтын үр дүнг танилцуулж, сайн туршлага, тулгамдсан асуудал, цаашид сайжруулах боломжийн талаар хэлэлцэв.
Талууд дээрх сургалт, хөтөлбөрийн үр дүнд тулгуурлан цөмийн салбарын мэргэжилтнүүдийн мэдлэг, ур чадварыг дээшлүүлэх, сургалтын агуулга, зохион байгуулалтыг тасралтгүй сайжруулах чиглэлээр хамтын ажиллагааг үргэлжлүүлэхээр санал солилцов.
Уулзалтын төгсгөлд хэлэлцсэн асуудал, цаашид хэрэгжүүлэх арга хэмжээг тусгасан Уулзалтын тэмдэглэлд гарын үсэг зурав.
Японы атомын энергийн агентлагтай хэрэгжүүлж буй хамтын ажиллагааны хүрээнд хэрэгжиж буй эдгээр сургалт, хүний нөөцийн хөгжлийн хөтөлбөр нь Монгол Улсын цөмийн салбарын мэргэжилтнүүдийн чадавхыг бэхжүүлэх, олон улсын туршлага, мэдлэгийг түгээн дэлгэрүүлэхэд хувь нэмэр оруулж байна.
