Татварын албаны албан хаагчдын сургалт, хөгжлийн хөтөлбөрт тусгагдсаны дагуу татварын улсын байцаагчдыг олон улсын татвар, үнэ шилжилтийн чиглэлээр мэргэшүүлэх сургалтыг 2026 оны 10 дугаар сарын 1–2-ны өдрүүдэд зохион байгууллаа.Тус сургалтад Татварын ерөнхий газрын харьяа Том татвар төлөгчийн газар, Нийслэлийн татварын газар, дүүргүүдийн 25 татварын улсын байцаагч хамрагдав.

Сургалтаар Давхар татварын гэрээний хэрэгжилт, Үйл ажиллагааны удирдлагыг Монгол Улсаас хэрэгжүүлдэг гадаадын аж ахуйн нэгжийн бүртгэл, тайлагнал, түүнчлэн үнэ шилжилтийн тайланг хүлээн авахад анхаарах асуудал зэрэг олон улсын татварын харилцаатай холбоотой сэдвүүдийг хамруулан, онолын мэдлэгийг практик хэрэглээтэй уялдуулан татварын улсын байцаагчдын олон улсын татвар, үнэ шилжилтийн талаарх мэдлэг, мэргэшлийн ур чадварыг дээшлүүлэх, практикт хэрэгжүүлэх чадавхыг бэхжүүлэхэд чиглүүллээ. Сургалтыг Татварын ерөнхий газрын Сургалтын хэлтэс болон Олон улсын татварын хэлтсийн сургагч багш нар удирдан явууллаа. Энэхүү сургалт нь татварын улсын байцаагчдын мэргэшлийн түвшинг дээшлүүлэх, олон улсын татварын харилцааны талаарх мэдлэгийг нэмэгдүүлэх, сайжруулахад чухал ач холбогдолтой юм.