Монгол Улсын Засгийн газрын 2026 оны 07 дугаар сарын 01-ний өдрийн 280 дугаар тогтоолоор “Төрийн архивын үйл ажиллагааны улсын үзлэг”-ийг 2026 оны IV улиралд зохион байгуулахаар шийдвэрлэсэний дагуу улсын үзлэг зохион байгуулах төв комисс 09 дүгээр сарын 30-ны өдөр Хууль зүй, дотоод хэргийн яаманд хуралдаж, үзлэгийн бэлтгэл ажил, үнэлгээний үзүүлэлт, аргачлал, хуваарь, ажлын зохион байгуулалт болон төсөв, зардлын асуудлыг хэлэлцэж, холбогдох шийдвэрийг гаргалаа.
Улсын үзлэгт Монгол Улсын хэмжээнд үйл ажиллагаа явуулж буй 37 төрийн архив хамрагдаж, архивын баримтын бүрдүүлэлт, хадгалалт хамгаалалт, тоо бүртгэл, ашиглалт, хүний нөөц, цахим шилжилт, үйлчилгээний хүртээмж зэрэг үндсэн чиглэлээр үйл ажиллагааг үнэлж, дүгнэнэ.
Төв комиссын дарга “Үзлэгийг зөвхөн баримт бичиг шалгах байдлаар хязгаарлахгүй, архивын бодит нөхцөл байдал, хэрэгжилтийн түвшин, тулгамдсан асуудлыг нотлох баримтад үндэслэн үнэлэх нь чухал” гэдгийг онцолж, 2021 оны улсын үзлэгээр өгсөн зөвлөмж, үүрэг даалгаврын хэрэгжилтийг мөн харгалзан үзэхийг чиглэл болголоо.
Улсын үзлэгийг 10 дугаар сарын 12-ноос эхлүүлж, нэгдсэн дүн, цаашид хэрэгжүүлэх арга хэмжээний саналыг 12 дугаар сарын 01-ний дотор Засгийн газрын хуралдаанд танилцуулахаар төлөвлөж байна. Үзлэгийн үр дүнд төрийн архивын өнөөгийн нөхцөл байдлыг тодорхойлон, цаашдын бодлого, зохион байгуулалт, хүний нөөц, цахим шилжилт, үйлчилгээний чанарыг сайжруулах чиглэлийг тодорхойлоход анхаарна.
