Орхон аймаг НҮБ-тай хамтран орон нутагт анхдагч олон төсөл хөтөлбөрийг амжилттай хэрэгжүүлж ирсэн. Тэдгээрээс НҮБ-ийн Хүүхдийн сантай хамтран хүүхэд рүү чиглэсэн сайн жишиг болохуйц үйл ажиллагааг амжилттай хэрэгжүүлж байна. Энэхүү хамтын ажиллагаагаа өргөжүүлж өнөөдөр НҮБ-ын Хөгжлийн хөтөлбөртэй хамтран ажиллах санамж бичиг байгууллаа. Санаж бичгийг аймгийн Засаг дарга Б.Зоригтбаяр, НҮБ-ын Хөгжлийн хөтөлбөрийн Монгол дахь суурин төлөөлөгч Лионел Лорон нар үзэглэлээ.

НҮБ-ын Хөгжлийн хөтөлбөр нь орнуудын түвшинд Нэгдсэн Үндэстний Байгууллагын үйл ажиллагааны гол хэрэгжүүлэгчийн үүргийг олон талаар гүйцэтгэж, тогтвортой хөгжил, ядуурлыг бууруулах, эмэгтэйчүүдийн эрхийг ахиулах, сайн засаглал, хууль дээдлэх ёсыг бэхжүүлэх зэрэг зорилтуудыг дэмжих чиглэлээр 170 гаруй оронд үйл ажиллагаагаа явуулдаг хөгжлийн байгууллага юм.

Монгол Улс дахь НҮБ-ын Хөгжлийн хөтөлбөр нь Эрдэнэт хотын уур амьсгалын өөрчлөлтөд тэсвэртэй, ногоон, хүртээмжтэй нэгдсэн хот төлөвлөлт, түүний хэрэгжилт, иргэдийн оролцоонд тулгуурласан ногоон хөгжлийн чиглэлээр дэмжих үйл ажиллагааг хамтран хэрэгжүүлэхээр санамж бичиг байгууллаа. Тухайлбал,

1. Ногоон хотын шалгуур үзүүлэлтийг хотын ерөнхий төлөвлөгөө, Засаг даргын үйл ажиллагааны хөтөлбөр, жилийн төлөвлөгөө, жилийн төсөвт тусгах, хотын хөгжлийн төлөвлөлгөөний гүйцэтгэлд хяналт тавих олон талт оролцогч талуудын оролцоог хангах, жил бүр ногоон хотын тайлан шалгуур үзүүлэлтийн гүйцэтгэлийн тайлан боловсруулах замаар Эрдэнэт хотын ногоон, хүртээмжтэй, уур амьсгалын өөрчлөлтөд тэсвэртэй хөгжлийг дэмжих.
2. Усны хэрэглээний үр ашгийг дээшлүүлэх, усыг дахин ашиглах, ус хангамжийн үйлчилгээг сайжруулах, байгальд суурилсан шийдлийн хүрээнд ногоон дэд бүтэц, голын экосистемийг нөхөн сэргээх, хүйтэн уур амьсгалын нөхцөлд тохирсон усны менежмент, усыг цэвэрлэх байгальд суурилсан шинэлэг технологи нэвтрүүлэх замаар хотын усны аюулгүй байдал, экосистемийн тэсвэрт чанарыг бэхжүүлэх.
3. Эрдэнэт хотын гэр хороололд хог хаягдлыг ангилах, дахин боловсруулах, байгаль орчинд ээлтэй хог хаягдлын удирдлагыг бэхжүүлэх.
4. Гэр хорооллын нүүрстөрөгчийн ялгарал багатай хөгжлийг дэмжих зорилгоор сэргээгдэх эрчим хүчний шийдлийг өргөжүүлэх, нүүрстөрөгчийн зах зээлийн өндөр баталгаатай санхүүжилтийн хэрэгслийг ашиглах боломжийг судлах.
5. Хүнсний үйлдвэрлэл эрхлэгч болон газар тариалан мал аж ахуйд байгальд ээлтэй технологийг нэвтрүүлэн дэмжиж, хүнсний аюулгүй байдлыг дээшлүүлэх, лаборторийн баталгаажуулалтыг сайжруулах.
6. Орон нутгийн өмчит байгууллагын санхүүгийн гүйцэтгэл, төсвийн үр ашгийг сайжруулах, төр, хувийн хэвшлийн түншлэл, хамтын санхүүжилтийн механизмыг өргөжүүлэх замаар хотын ногоон дэд бүтцэд оруулах хөрөнгө оруулалтыг нэмэгдүүлэх чиглэлээр хамтран ажиллана.