Ерөнхий боловсролын сургуулиудын бүлэг дүүргэлтийг тэнцвэржүүлж, багшийн ачааллыг бууруулах хүрээнд улс болон орон нутгийн төсвийн хөрөнгө оруулалтаар сургууль цэцэрлэг барих ажлыг үе шаттай хийж байна. Ирэх 2027 онд аймгийн хэмжээнд нийт дөрвөн сургууль гурван цэцэрлэг ашиглалтад оруулахаар бүтээн байгуулалтын ажил үргэлжилж байна.
Тодруулбал: “Эрдэнэт Үйлдвэр” ТӨҮГ-ын хөрөнгө оруулалтаар Зэст багийн “Уурхайчин” хороололд 280 хүүхдийн ортой, 2А хороололд улсын төсвийн хөрөнгө оруулалтаар 150 хүүхдийн ортой, Найрамдал багт орон нутгийн хөрөнгө оруулалтаар 280 хүүхдийн ортой цэцэрлэгүүд тус тус ашиглалтад орно.
Мөн улсын төсвийн хөрөнгө оруулалтаар 2А болон 7А хорооллуудад 960 хүүхдийн багтаамжтай сургууль ашиглалтад орох бол “Эрдэнэт Үйлдвэр” ТӨҮГ-ын хөрөнгө оруулалтаар Уурхайчин хороололд 640 хүүхдийн багтаамжтай сургууль, орон нутаг болон улсын төсвийн хөрөнгө оруулалтаар Рашаант багийн 250 хүүхдийн багтаамжтай сургуулиуд тус тус ашиглалтад орно.
Эдгээр сургууль цэцэрлэгийн тавилга эд хогшил, тоног төхөөрөмж, сургалтын хэрэглэгдэхүүнийг 2027 оны орон нутгийн төсөвт тусгуулахаар аймгийн боловсролын газраас саналаа хүргүүлжээ. Аймгийн хэмжээнд 17 сургуулийн 23 хичээлийн байр нь нийт 13682 хүүхдийн хүчин чадалтай. Зарим сургуулиудад анги дүүргэлт дунджаар 37, бага, дунд ангиуд 44-53 хүүхэдтэй байгаа нь сургалтын чанар, хүүхдийн хөгжилд сөргөөр нөлөөлөх эрсдэлтэй.
Шинэ суурьшлын бүс болох Найрамдал багт орон нутгийн төсвийн хөрөнгө оруулалтаар барьж буй уг цэцэрлэг нь орон нутгийн төсвийн хөрөнгөөр барьж буй 3 дахь цэцэрлэг юм.
Төрийн өмчийн 17 сургуулийн 23 хичээлийн байр нь нийт 13682 хүүхдийн хүчин чадалтай. 2025-2026 оны хичээлийн жилд төрийн өмчийн сургуулиудын 697 бүлэгт 24903 хүүхэд суралцаж байна. Аймгийн төвийн 4,5,8,13,14 дүгээр сургуулиудын ачаалал хэт өндөр, анги дүүргэлт дунджаар 37, бага, дунд ангиуд 44-53 хүүхэдтэй байгаа нь сургалтын чанар, хүүхдийн хөгжилд сөргөөр нөлөөлж багшийн ачааллыг нэмэгдүүлж байна.
Энэ асуудлыг шийдвэрлэх, сургуулиудын бүлэг дүүргэлтийг тэнцвэржүүлж, багшийн ачааллыг бууруулах чиглэлээр улс болон орон нутгийн төсвийн хөрөнгө оруулалтаар тодорхой төсөл арга хэмжээнүүдийг хэрэгжүүлж эхлээд байна.
Тухайлбал улсын төсвийн 2.7 тэрбум төгрөгийн хөрөнгө оруулалтаар 2025 оноос 7А хороололд 960 хүүхдийн сургууль баригдаж эхэлсэн бөгөөд уг барилга ашиглалтад орсноор 5,14 дүгээр сургуулиудын бүлэг дүүргэлт, ачаалал буурна. Мөн 2026 онд улсын төсвийн 2.7 тэрбум төгрөгийн хөрөнгө оруулалтаар 2А хороололд 960 хүүхдийн сургуулийн барилгын ажил эхлэх бөгөөд барилга ашиглалтад орсноор 1,8 дугаар сургуулиудын, улс болон орон нутгийн төсвийн хөрөнгө оруулалтаар Рашаант багийн 250 хүүхдийн сургуулийг дуусгаж “Ирээдүйн одод” сургуулийг шилжүүлснээр 13 дугаар сургуулийн, Зэст багийн 19 дүгээр сургуулийг орон нутгийн өмчид шилжүүлж, “Уурхайчин” хороололд “Эрдэнэт үйлдвэр” ТӨҮГ-ын хөрөнгө оруулалтаар 960 хүүхдийн сургууль барьснаар 4 дүгээр сургуулийн ачааллыг тус тус бууруулахаар тооцож байна. Ингэснээр аймгийн хэмжээнд сургуулиудын ачаалал тэнцвэржиж, ээлжийн коэффицент, багшийн ачаалал буурч, сургалтын чанарт ахиц гарна гэж үзэж байна.
