“Монгол-Чехийн бизнес форум Дундговь-2026” өнөөдөр Мандалговь хотноо болж, Бүгд Найрамдах Чех Улсаас Монгол Улсад суугаа Онц бөгөөд Бүрэн эрхт Элчин сайд Ян Вытопил тэргүүтэй Чехийн Эдийн засгийн танхим, Чех-Монголын Худалдааны танхим болон бизнесийн байгууллагуудын төлөөлөгчид Дундговь аймагт ажиллаж байна.
Энэ хүрээнд аймгийн Засаг дарга С.Мөнхчулуун, Засаг даргын орлогч Ц.Хүрэлбаатар болон холбогдох албаныхан Чехийн талын төлөөлөгчидтэй уулзаж, эдийн засаг, худалдаа, бизнесийн хамтын ажиллагааг орон нутгийн түвшинд өргөжүүлэх, хөрөнгө оруулалт татах, шинэ төсөл хэрэгжүүлэх боломжийн талаар санал солилцлоо.
Уулзалтаар малын гаралтай түүхий эд боловсруулах, нэмүү өртөг шингэсэн бүтээгдэхүүн үйлдвэрлэх, хүнсний үйлдвэрлэлийн шинэ технологи нэвтрүүлэхийн зэрэгцээ архитектур, эрчим хүчний хэмнэлттэй шийдэл, тээвэр, логистик, мэргэжлийн боловсрол, хүний нөөц, эрүүл мэнд, аялал жуулчлалын чиглэлээр хамтран ажиллах боломжийг хэлэлцэв.
Мөн Чехийн талын орон нутгийн жижиг төсөл болон бизнес, эдийн засгийн хамтын ажиллагааг дэмжих хөтөлбөрүүдийн хүрээнд Дундговь аймагт хэрэгжүүлэх боломжтой төсөл, санаачилгыг хамтран судлахаар санал солилцлоо.
Монгол, Чех хоёр улс 1950 онд дипломат харилцаа тогтоосон бөгөөд 2025 онд харилцаагаа Иж бүрэн түншлэлийн түвшинд хүргэсэн. Энэхүү харилцааг орон нутгийн түвшинд бодит төсөл, хөрөнгө оруулалт, технологи, хүний нөөцийн хамтын ажиллагаагаар өргөжүүлэх боломжтойг талууд онцолсон юм.
