Аймгийн Засаг даргын дэргэдэх агентлаг, хэлтэс, албадын удирдлагуудын шуурхай хурал тогтсон ёсоор өнөөдөр хуралдлаа.

Хурлын эхэнд Төрийн үйлчилгээ-мэдээллийн төвийн 7032-1111 утсанд болон биеэр ирсэн иргэдийн гомдол санал, түүний шийдвэрлэлттэй танилцав.

Өнгөрөгч долоон хоногийн хугацаанд 13 асуудлаар 17 иргэн хандаж, гомдол, саналаа ирүүлсэн байна. Тухайлбал, малын вакцин, эм тариаг хэт үнэтэй зарж буй тухай, бэлчээрийн газрыг дур мэдэн хашаалж байгаа талаар, нийтийн орон сууцуудын усны тасалдал, инженерийн шугам сүлжээний ажлын удаашрал, говийн сумдаар хулгайн гэмт хэрэг гарч байгаа талаар, “Онги Ус суваг” байгууллагын ажилтнуудын харилцаа холбоотой асуудлаар тус тус гомдол, мэдээллүүд иржээ.

Дээрх гомдол, шүүмжлэлийн гурван асуудлаас бусдыг нь шийдвэрлэж, иргэнд хариу мэдээлэл хүргүүлсэн. Тус хугацаанд 1585 иргэн төрийн үйлчилгээг нэг цэгээс авч, үүнээс хамгийн олон буюу 482 иргэн иргэний бүртгэлтэй холбоотой асуудлаар үйлчилгээ авсан байна.

Хуралдаанаар:

✅ Аймгийн Засаг даргын орлогч дулааны станцын хоёрдугаар хэлхээний ажил болох шугам сүлжээний өргөтгөл, шинэчлэлийн ажлын явцад хяналт хийсэн талаар,

✅ Мал эмнэлгийн газраас малын эмийн сангуудын үйл ажиллагаанд хяналт, шалгалт зохион байгуулсан тухай,

✅ Хүнс, хөдөө аж ахуйн газраас хүнсний дэлгүүрүүдэд хүнсний аюулгүй байдалд хяналт шалгалт хийж, “Өв Эко мийт” махны үйлдвэрийн үйл ажиллагаанд хяналт хийж, иргэний гомдлыг шийдвэрлэсэн тухай,

✅ Аймгийн Цагдаагийн газраас Өмнөговь, Дундговь аймгийн цагдаагийн байгууллагатай хамтран хулгайн гэмт хэрэг гарч буй сумдад ажиллаж буй талаар,

✅ Газрын харилцаа, барилга, хот байгуулалтын газраас бэлчээрийн газар хашаалсан асуудлыг хуулийн байгууллагаар шийдүүлэх, Содон хороололд дулааны шугам сүлжээг өргөтгөх асуудлыг шийдвэрлүүлэхээр ажиллаж байгаа талаар,

✅ Хүүхэд, Гэр бүлийн хөгжил, хамгааллын газраас E-Mongolig аппликэйшн-д орчны осол гэмтлийн эрсдэл, аливаа мэдээллийг оруулах болон, орсон мэдээллүүдтэй танилцан, шийдвэрлэж байх тухай,

✅ ЭБЦТС ТӨХК-ийн Өвөрхангай аймаг дахь салбараас ухаалаг тоолуур суурилуулалтын ажлын явцын талаар тус тус мэдээлэл өглөө.