Япон улсын ОУ-ын хамтын ажиллагааны байгууллага (JICA)-ын дэмжлэгтэйгээр “Ерөнхий боловсролын сургуулийн хүүхдийн шүд цоорлоос урьдчилан сэргийлэх, фторын уусмалаар ам зайлах үйл ажиллагааг дэмжих төсөл” нийслэлийн 9 дүүрэг, 5 аймгийн 14 улсын сургуульд хэрэгжиж байна. Энэ төсөлд Баянгол дүүрэг дэх Нийслэлийн ерөнхий боловсролын 28 дугаар сургуулийн 1–3 дугаар ангийн 734 сурагч хамрагдаж байна.

Төслийн хүрээнд хүүхдүүдийн амны хөндийн үзлэг, оношилгоог хийхээс гадна шүдээ зөв угаах дадал хэвшүүлэх, фторын уусмалаар ам зайлах, сургуулийн орчинд шүд цоорлоос урьдчилан сэргийлэх үйл ажиллагааг тогтмол явуулах зорилготой. Мөн хүүхдийн шүд эрүүл байхад эцэг, эхийн оролцоо, дэмжлэг чухал. Тухайлбал, хүүхдээ өдөр бүр зөв аргачлалаар шүдээ угаахад нь дэмжих, амны хөндийн эрүүл ахуйд нь анхаарах, фторын уусмалаар ам зайлах үйл ажиллагаанд тогтмол хамруулах, шаардлагатай тохиолдолд мэргэжлийн эмчид үзүүлэх зэрэг нь хүүхдийн амны хөндийн эрүүл мэндийг сайжруулахад чухал ач холбогдолтой гэдгийг төслийн багийнхан зөвлөж байна.