ӨМНӨГОВЬ АЙМГИЙН ХӨГЖЛИЙН ЖИЛИЙН ТӨЛӨВЛӨГӨӨНИЙ
ТЭРГҮҮЛЭХ ЧИГЛЭЛ
Ерөнхий мэдээлэл:
Аймгийн Засаг даргын Тамгын газар нь Хөгжлийн бодлого, төлөвлөлт, түүний
удирдлагын тухай хуулийн 18.5-д “Хөгжлийн асуудал хариуцсан аймаг, нийслэлийн
байгууллагууд Улсын хөгжлийн жилийн төлөвлөгөөний төсөлд суурилсан Аймаг,
нийслэл, хотын хөгжлийн жилийн төлөвлөгөөний төслийг 9 дүгээр сарын 01-ний
дотор боловсруулна.” гэж, 18.6-д “Аймаг, нийслэлийн иргэдийн Төлөөлөгчдийн
Хурал Аймаг, нийслэл, хотын хөгжлийн жилийн төлөвлөгөөний төслийг жил
бүрийн 10 дугаар сарын 01-ний дотор батална.” гэж тус тус заасны дагуу
“Өмнөговь аймгийн хөгжлийн 2027 оны төлөвлөгөө батлах тухай” Аймгийн иргэдийн
Төлөөлөгчдийн Хурлын тогтоол, “Өмнөговь аймгийн хөгжлийн 2027 онд баримтлах
бодлогын тэргүүлэх чиглэл”-ийг 1 дүгээр хавсралтаар, “Өмнөговь аймгийн хөгжлийн
2027 оны төлөвлөгөө”-г 2 дугаар хавсралтаар, “Өмнөговь аймгийн хөгжлийн 2027
оны төлөвлөгөөний хяналт, шинжилгээ, үнэлгээний үзүүлэлт”-ийг 3 дугаар
хавсралтаар батлуулахаар боловсрууллаа.
Түүнчлэн Монгол Улсын Тэргүүн шадар сайд бөгөөд Эдийн засаг, хөгжлийн
сайдын 2025 оны А/06 дугаар “Аргачлал шинэчлэн батлах тухай” тушалаар
батлагдсан аргачлалын дагуу Өмнөговь аймгийг 2026-2030 онд хөгжүүлэх таван
жилийн үндсэн чиглэл, аймгийн Засаг даргын 2025-2028 оны “Өсөлттэй Өмнөговь”
мөрийн хөтөлбөрийг хэрэгжүүлэх зорилгоор үр дүнд суурилсан нэгдсэн
төлөвлөлтийн арга зүйгээр боловсруулсан болно.
Тэргүүлэх чиглэл:
Хөгжлийн бодлого, төлөвлөлт, түүний удирдлагын тухай хуульд аймгийн
хөгжлийн жилийн төлөвлөгөө нь аймгийг хөгжүүлэх таван жилийн үндсэн чиглэлд
тусгагдсан зорилго, зорилтыг тухайн жилд хэрэгжүүлэх, төсөв, санхүүгийн эх
үүсвэрийг тусгасан төсөл, арга хэмжээ бүхий төлөвлөлтийн баримт бичиг байхаар
хуульчилсан бөгөөд энэ хүрээнд аймгийг 2026-2030 онд хөгжүүлэх таван жилийн
үндсэн чиглэлд тодорхойлсон бодлогын үндсэн чиглэл болох "Хүний хөгжил”,
"Нийгмийн хөгжил ба үндэсний нэгдмэл үнэт зүйл”, "Эдийн засаг ба дэд бүтцийн
хөгжил”, "Байгаль орчин, ногоон эдийн засаг”, "Засаглал, дижитал шилжилт”,
"Бүсийн хөгжил”, "Үндэсний өрсөлдөх чадвар”, "Шинжлэх ухаан, технологи, хиймэл
оюун” гэсэн бодлогын 8 чиглэлийг хамарсан үндэсний 10, салбарын 25, төсвийн
ерөнхийлөн захирагчийн 59, хөтөлбөрийн 131 үр дүнг хэрэгжүүлэх хүрээнд 324
төсөл, арга хэмжээг хэрэгжүүлэхээр боловсруулсан болно.
https://eoffice.omnogovi.gov.mn/email/process/action/emailinboxattachfiledownload.html?attachid=220293b224c0f3c2fc990bb54f4412fbb0c62414
