Цагдаагийн байгууллагын алба хаагчдад цацрагийн аюулгүй байдлын талаарх мэдлэг олгох, цацрагийн осол, зөрчил болон аюул үүссэн үед хэрэгжүүлэх хариу арга хэмжээний бэлэн байдлыг хангах зорилгоор сургалт зохион байгууллаа.
Сургалтыг Монгол Улсын Цагдаагийн албаны тухай хуулийн 12 дугаар зүйлийн 12.1.3, Цөмийн энергийн тухай хуулийн 34 дүгээр зүйлийн 34.4.2, 36 дугаар зүйлийн 36.1.6-д заасан чиг үүргийн хүрээнд Цөмийн энергийн комиссын Ажлын албаны Цацрагийн аюулгүй байдлын бодлогын газар, Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албатай хамтран 2026 оны 09 дүгээр сарын 15-ны өдөр зохион байгуулсан.
“Цацрагийн аюулгүй байдлын мэдлэг ба хариу арга хэмжээ” сэдвийн хүрээнд зохион байгуулсан сургалтаар цацрагийн осол, зөрчил гарсан үед авах арга хэмжээ, холбогдох байгууллагад шуурхай мэдээлэх, ослын хор уршгийг арилгах, аюулгүй байдлыг хангах болон иргэдийн амь нас, эрүүл мэндийг хамгаалах чиглэлээр мэдлэг, мэдээлэл өгч, зөвлөмж хүргэлээ.
Сургалтад дүүрэг дэх цагдаагийн газар, хэлтсийн нийтийн хэв журам хамгаалах, олон нийтийн аюулгүй байдлыг хангах тасгийн дарга, чиглэлийн ахлах байцаагч, ахлах байцаагч нар танхимаар, орон нутгийн цагдаагийн газар, хэлтсийн холбогдох алба хаагчид цахимаар хамрагдаж, нийт 76 алба хаагч оролцлоо.
Тус сургалт нь цацрагийн аюул, осол, зөрчлийн үед цагдаагийн байгууллагаас хэрэгжүүлэх арга хэмжээний талаарх алба хаагчдын мэдлэг, бэлэн байдлыг дээшлүүлэх, холбогдох байгууллагуудтай шуурхай хамтран ажиллах, иргэдийн аюулгүй байдлыг хангахад чиглэв.
