Канад-Монголын MERIT төсөл говийн бүсийн төрийн албан хаагчдад зориулсан “Үр дүнд суурилсан удирдлага” сэдэвт гурван өдрийн эрчимжүүлсэн сургалтыг 2026 оны 9 дүгээр сарын 14-16-ны өдрүүдэд Дундговь аймагт зохион байгуулж байна.
Сургалтад Говьсүмбэр, Дорноговь, Өвөрхангай, Өмнөговь, Дундговь аймгийн төрийн байгууллагын нийт 28 төлөөлөл оролцож байгаа бөгөөд төрийн албан хаагчдын үр дүнд суурилсан удирдлага, хяналт-шинжилгээ, үнэлгээний талаарх мэдлэг, ур чадварыг дээшлүүлэх, олон улсын сайн туршлага, арга аргачлалыг ажлын байранд нэвтрүүлэх чадавхыг бэхжүүлэхэд сургалтын зорилго чиглэж байна.
Сургалтын үеэр өөрчлөлтийн онол, үр дүнгийн гинжин хэлхээ, эрсдэлийн шинжилгээ, логик загвар, гүйцэтгэлийг хэмжих хүрээ болон шалгуур үзүүлэлт боловсруулах, чанарын болон тоон мэдээлэл цуглуулах арга зэрэг сэдвээр онолын мэдлэг олгож, дадлага ажил хийж байгаа юм.
Тус сургалтыг MERIT төслийн техникийн зөвлөх Рэймонд Жервэйс болон Хяналт-шинжилгээ, үнэлгээний багийн ахлагч С.Дэлгэрмөрөн нар чиглүүлж, онол, практикийг хослуулан зохион байгуулж байна.
Мөн Монгол Улсад үр дүнд суурилсан удирдлагыг нэвтрүүлэх бодлого, эрх зүйн орчин, хэрэгжилтийн явц, тулгамдаж буй асуудлын талаар хэлэлцэж, бодит жишээн дээр ажиллах замаар үр дүнгийн томьёолол боловсруулах дадлага хийж гүйцэтгэж байна.
Түүнчлэн оролцогчид өгөгдөл, мэдээллийг шийдвэр гаргалтад үр дүнтэй ашиглах аргачлалд суралцаж, өөрсдийн ажлын туршлагатай холбон хэрэгжүүлэх боломжийн талаар хэлэлцэж байгаа бөгөөд энэхүү сургалт нь төрийн байгууллагын бодлого төлөвлөлт, хэрэгжилт, хяналт-шинжилгээ, үнэлгээний чанарыг сайжруулахад чиглэж байгаа юм.
