Тайлант онд Хөдөлмөр эрхлэлтийг дэмжих сангаас улсын хэмжээнд нийт 40.0 тэрбум төгрөгийн жижиг зээлийг жилийн 7 хувийн хүүтэйгээр ХААН болон Төрийн банкаар дамжуулан бизнес эрхлэгч иргэн, аж ахуйн нэгж, байгууллагад олгохоор шийдвэрлэсэн.

Манай аймгийн хэмжээнд иргэд, аж ахуйн нэгж, байгууллагаас нийт 92 төсөл хүлээн авч, жижиг зээлийн төсөл сонгон шалгаруулах ажлын хэсэг 4 удаа хуралдан, нийт 76 төслийг дэмжиж, шаардлага хангаагүй 16 төслийг буцаасан байна.

Засгийн газрын 340 дүгээр тогтоолд заасны дагуу төслийг сонгон шалгаруулах ажлын хэсгийг 5 хүний бүрэлдэхүүнтэйгээр байгуулан ажилласан.

Мөн Хөдөлмөр, халамжийн үйлчилгээний ерөнхий газраас ирүүлсэн чиглэлийн дагуу зээл олгох арилжааны банкны төлөөлөл, мэргэжилтнүүдтэй хамтран зээлийн өмнөх сургалтыг танхим болон цахим хэлбэрээр зохион байгуулж, 77 иргэнд банкны шалгуур, бизнес төсөл боловсруулах аргачлалын талаар сургалт, мэдээлэл, зөвлөгөө өгч ажилласан.

Ажлын хэсгийн хурлаар дэмжигдсэн 76 төслийн нэрсийг холбогдох арилжааны банкуудад хүргүүлснээс:

• ХААН банк – 32 иргэнд 968.7 сая төгрөгийн зээл;

• Төрийн банк – 19 иргэнд 438.9 сая төгрөгийн зээл;

• Нийт – 51 иргэнд 1,407.6 сая төгрөгийн зээл олгож 66 ажлын байр шинээр бий болсон байна.

Жижиг зээлд журамд заасны дагуу хувиараа хөдөлмөр эрхлэгч, малчин, гадаад улсад хөдөлмөр эрхэлж байгаад эх орондоо буцаж ирсэн иргэн, бичил үйлдвэрлэл, үйлчилгээ эрхлэгч иргэн, аж ахуйн нэгж, байгууллагагууд хамрагдсан.

Санхүүжилтийн эх үүсвэр дууссан хэдий ч дэмжигдсэн төслүүдийг санхүүжүүлэх зорилгоор ХААН болон Төрийн банктай хамтран ажиллаж, зээлийн эргэн төлөлтөөс дахин санхүүжилт олгуулах талаар хүсэлт гарган ажиллаж байна. Одоогоор ХААН банк зээлийн эргэн төлөлтөөс 100.0 сая төгрөгийн санхүүжилт олгохоор шийдвэрлэсэн бөгөөд уг санхүүжилтэд хамруулах дэмжигдсэн иргэдийн жагсаалтыг банкинд хүргүүлээд байна.