Нар, салхины эрчим хүч, алслагдсан сумдын тархмал эх үүсвэр, батарей хуримтлуур болон хийн цахилгаан станцын чиглэлээр гурван жилийн хугацаанд хамтран ажиллана

Улаанбаатар хот, 2026 оны 8 дугаар сарын 25

Эрчим хүчний үндэсний төв ТӨХХК Хятадын China Central Strategic Advisory Group (CCSAG) байгууллагатай хамтран ажиллах Харилцан ойлголцлын санамж бичигт өнөөдөр гарын үсэг зурлаа. Уг баримт бичиг нь Монгол Улсын эрчим хүчний салбарт стратегийн хамтын ажиллагааны суурийг тавьж байгаа юм.

Санамж бичигт Эрчим хүчний үндэсний төв ТӨХХК-ийн гүйцэтгэх захирал Э.Мөндөр, China Central Strategic Advisory Group-ийн гадаад бизнес хариуцсан дэд ерөнхийлөгч, Төлөөлөн удирдах зөвлөлийн гишүүн Лю Фэн нар гарын үсэг зурав.

Хамтын ажиллагааны таван чиглэл

Талууд Монгол Улсын эрчим хүчний салбарын дараах таван чиглэлээр хөрөнгө оруулалт, санхүүжилт, технологи болон төсөл хэрэгжүүлэлтийн боломжийг хамтран судлахаар тохиролцлоо:

Нар, салхины эрчим хүч. Монгол Улсад нар, салхины сэргээгдэх эрчим хүчний төслүүдийг хамтран судалж хөгжүүлэх, хөрөнгө оруулалт, санхүүжилтийн эх үүсвэрийг тодорхойлж хэрэгжүүлэх.

Алслагдсан аймаг, сумдын тархмал эх үүсвэр. Орон нутгийн төвүүдэд тархмал сэргээгдэх эрчим хүчний эх үүсвэр, түүнийг дагасан дэд бүтцийг хамтран байгуулах.

Батарей хуримтлуурын систем (BESS). Эрчим хүчний системийн найдвартай, тогтвортой ажиллагааг хангахад чиглэсэн хуримтлуурын төслүүдийг хөгжүүлэх.

Нүүрстөрөгч багатай шинэ технологи. Ногоон устөрөгч, эрчим хүч хуримтлуулах систем зэрэг чиглэлээр судалгаа, хөгжүүлэлт хийх.

Хийн цахилгаан станц. Хийн цахилгаан станц байгуулах төслүүдийг хамтран боловсруулж хэрэгжүүлэх.

Дээрх таван чиглэлээс гадна талууд төслийн урьдчилсан судалгаа хийх, техник-эдийн засгийн үндэслэл боловсруулах, технологийн шийдэл сонгох, төсөл хэрэгжүүлэх бүтцийг тодорхойлох, мэргэжилтэн солилцох, хүний нөөцийн чадавх бэхжүүлэх болон технологи дамжуулах чиглэлээр хамтран ажиллах боломжтой.

Хамтын ажиллагаа нь харилцан ашигтай байх, тэгш эрх, харилцан хүндэтгэх, ил тод байх болон холбогдох хууль тогтоомжийг дагаж мөрдөх зарчимд тулгуурлана. Талууд төслүүдийн хэрэгжих боломжийг үнэлэхийн тулд мэдээлэл солилцох бөгөөд шаардлагатай тохиолдолд төрийн эрх бүхий байгууллага, хөрөнгө оруулагч, санхүүгийн байгууллага, технологийн түншүүдтэй хамтран ажиллана.