Тэшиг суманд зоонозын халдварт боом өвчний тохиолдол бүртгэгдсэнтэй холбогдуулан аймгийн Засаг дарга Д.Пүрэв-Очироор ахлуулсан ажлын хэсэг тус суманд ажиллаж, нөхцөл байдалтай танилцан, авч хэрэгжүүлж буй арга хэмжээ болон өвөлжилтийн бэлтгэл ажлын явцыг шалгалаа.
2026 оны наймдугаар сарын 27-ны өдөр хүн, малд боом өвчний тохиолдол бүртгэгдсэнтэй холбогдуулан сумын сургууль, цэцэрлэгийн үйл ажиллагааг 14 хоногийн хугацаанд цахим хэлбэрт шилжүүлсэн. Халдвар хамгааллын нөхцөл байдлыг харгалзан үзэж, хичээл, сургалтын үйл ажиллагааг 9-р сарын 14-ний өдрөөс хэвийн горимд шилжүүлэхээр шийдвэрлэлээ.
Боом өвчний тархалт, халдварын эрсдэлээс урьдчилан сэргийлэх хүрээнд Тэшиг сумын төр, төсвийн байгууллагын албан хаагчид ээлжээр постод гарч, хяналт тавин ажиллаж байна. Мөн голомтын болон сэжигтэй бүсэд байгаа мэдрэмтгий мал, амьтдыг 100 хувь вакцинжуулах ажлыг зохион байгуулсан.
Сүүлийн үед Тэшиг сумын суурьшлын бүс болон малчин иргэдийн эзэмшил газарт хүрэн баавгай нэвтэрч, иргэдийн аюулгүй байдалд эрсдэл учруулах нөхцөл үүссэнтэй холбогдуулан аймаг, орон нутаг болон Хилийн цэргийн 0286 дугаар анги хамтран ажиллахаар боллоо.
Аймгийн онцгой комиссын дарга, Аймгийн Засаг дарга Д.Пүрэв-Очир Тэшиг суманд ажиллахдаа дараах асуудлуудыг шийдвэрлэлээ.
1. Өвөлжилт, хаваржилтын бэлтгэл ажлын хүрээнд суманд дутагдалтай байгаа шатахууны нөөцийг нөхөн бүрдүүлэхээр Орхон аймаг дахь бүсийн салбараас нэмэлт шатахуун татан авах асуудлыг холбогдох байгууллага, албан тушаалтнуудтай зөвшилцөн шийдвэрлэж, ирэх долоо хоногт багтаан нөөцийг татан авч бүрдүүлэх
2. Боом өвчний тохиолдол бүртгэгдсэнтэй холбогдуулан сумын Шуурхай штабын үйл ажиллагаа болон хорио цээрийн дэглэмийг хэрэгжүүлэх явцад гарсан 10 сая төгрөгийн зардлыг шийдвэрлэв.
Мөн хөдөө аж ахуйн салбарын өвөлжилтийн бэлтгэл, бэлэн байдлыг хангах ажлыг эрчимжүүлэх, сумын Онцгой комиссын үйл ажиллагааг сайжруулах, халдварт өвчин болон хүрэн баавгайн эрсдэлээс иргэдийн эрүүл мэнд, аюулгүй байдлыг хамгаалах, урьдчилан сэргийлэх арга хэмжээг тогтмол авч хэрэгжүүлэхийг холбогдох албаныханд үүрэг болголоо.
Түүнчлэн сумын хэмжээнд хэрэгжүүлж буй бодлого, үйл ажиллагаа, авч хэрэгжүүлж буй арга хэмжээний талаарх мэдээллийг иргэд, олон нийтэд шуурхай, ойлгомжтой, хүртээмжтэй хүргэж ажиллах чиглэл өглөө.
