МӨАУМХ-ноос жил бүр уламжлал болгон зохион байгуулдаг Зүүн болон Говийн бүсийн аймгуудын өрхийн эмч, мэргэжилтнүүдийг чадавхжуулах “Хүн төвтэй нэгдмэл тасралтгүй тусламж үйлчилгээ” сэдэвт уулзалт, сургалт Дундговь аймагт 2026 оны 08-р сарын 20-22-ны өдрүүдэд болж байна.

Тус уулзалт, сургалтад Дорнод, Хэнтий, Говьсүмбэр, Өмнөговь, Дундговь, Төв, Ховд, Архангай аймгийн өрхийн эрүүл мэндийн байгууллагын 150 гаруй эмч, эмнэлгийн мэргэжилтэн оролцож байгаа юм.

Үйл ажиллагааны хүрээнд өрхийн эрүүл мэндийн тусламж, үйлчилгээний чанар, хүртээмжийг сайжруулах, хүн төвтэй, нэгдмэл, тасралтгүй тусламж үйлчилгээний талаарх мэдлэг, ур чадварыг нэмэгдүүлэх чиглэлээр сургалт зохион байгуулахаас гадна онол, практикийн бага хурал, спортын гурван төрөлт тэмцээн тус тус зохион байгуулагдах юм.

Уулзалт, сургалтын нээлтийн үйл ажиллагаанд аймгийн Засаг даргын орлогч Ц.Хүрэлбаатар оролцож, нийт эмч, мэргэжилтнүүдэд амжилт хүсэж, мэндчилгээ дэвшүүллээ.

Тус үйл ажиллагааг “Өлзийт манал” Өрхийн эрүүл мэндийн төв зохион байгуулж байгаа бөгөөд Засаг даргын тамгын газар болон аймгийн Эрүүл мэндийн газар дэмжин ажиллаж байгаа юм.