АНУ-ын Элчин сайдын яамны Иргэн-Цэргийн дэмжлэгийн болон Эмнэлгийн зөвлөлийн багаас Дундговь аймгийн Эрүүл мэндийн газар болон эрүүл мэндийн байгууллагуудад өндөр хурдны интернэтийн 15 Starlink төхөөрөмжийг гардууллаа.

Тус ажлын хэсгийг аймгийн Засаг даргын орлогч Ц.Хүрэлбаатар, аймгийн Засаг даргын тамгын газрын дарга П.Бүрэнжаргал нар хүлээн авч уулзан, аймгийн эрүүл мэндийн салбар, гамшгийн үеийн бэлэн байдал, нөхцөл байдлын талаар санал солилцов.

Энэхүү дэмжлэг нь сум орон нутагт эрүүл мэндийн тусламж үйлчилгээ үзүүлэх, харилцаа холбоог сайжруулах, алслагдсан бүс нутагт ажиллаж буй эрүүл мэндийн ажилтнуудын үйл ажиллагааг дэмжих, эрүүл мэндийн тусламж, үйлчилгээний уялдаа холбоог хангах, мэдээллийн технологийн хүртээмжийг нэмэгдүүлэхэд чухал ач холбогдолтойг онцолсон юм. Мөн цаашдын хамтын ажиллагааны талаар санал солилцож, болзошгүй гамшиг, аюул ослын үед хэрхэн ажиллах талаар сургалт зохион байгуулах, Онцгой байдлын газарт дэмжлэг үзүүлэх зэрэг асуудлыг хэлэлцлээ.