Энэ хүрээнд Дархан-Уул аймгийн өсвөрийн “ХУРДАН” клубийн гишүүдийн санаачилгаар дроны тусламжтай амьдарч буй орчиндоо эрсдэлийг илрүүлэх ажлыг эхлүүлсэн нь өнөөдөр “Дронт эргүүл” нэртэй хамтын ажиллагааны үр дүнтэй тогтолцоо болон өргөжөөд байна.
Өсвөрийн “ХУРДАН” клубийн гишүүдийн дэвшүүлсэн санаачилгыг аймгийн Иргэдийн Төлөөлөгчдийн Хурал, Онцгой байдлын газар, Цагдаагийн газар, Бүсийн шүүх шинжилгээний төв болон холбогдох байгууллагууд дэмжин ажил хэрэг болгосноор дроны технологид суурилсан эргүүл, хяналтын үйл ажиллагааг тогтмол хэрэгжүүлж эхэлжээ.
“Дронт эргүүл”-ийн хүрээнд авто зам, олон нийтийн газар болон хүн хүрч шалгахад хүндрэлтэй бүсүүдэд үүсэж болзошгүй эрсдэл, зөрчлийг илрүүлэн холбогдох байгууллагад шуурхай мэдээлж, урьдчилан сэргийлэх арга хэмжээг цаг алдалгүй авч ажиллаж байна.
Энэхүү үйл ажиллагаа нь хүүхэд, залуусын оролцоог дэмжихийн зэрэгцээ орчин үеийн технологийг олон нийтийн аюулгүй байдлыг хангах үйл хэрэгт үр дүнтэй ашиглаж буй шинэлэг жишээ болж байна.
Дархан-Уул аймагт “Дронт эргүүл” ажиллаж эхэлснээс хойш цагдаагийн байгууллагад бүртгэгдсэн дуудлага, мэдээлэл 1.9% хувиар, гудамж талбай, аж ахуйн нэгж, олон нийтийн газарт бүртгэгдсэн гэмт хэргийн гомдол, мэдээлэл 37.5% хувиар, бүртгэгдсэн зөрчил 25% хувиар тус тус буурсан үзүүлэлт гарсан байна.
Дархан-Уул аймагт хэрэгжиж буй энэхүү санаачилга нь хүүхэд, залуучуудын идэвхтэй оролцоо, төрийн байгууллагуудын хамтын ажиллагаа, дэвшилтэт технологийн боломжийг нэгтгэн эрсдэлийг бууруулах, аюулгүй орчныг бүрдүүлэхэд бодит хувь нэмэр оруулж буй сайн туршлага болж байна.
