Аймгийн удирдах ажилтны шуурхай зөвлөгөөн өнөөдөр болж, хурлыг Дундговь аймаг Засаг даргын Тамгын газар-ын цахим хуудсаар шууд дамжууллаа. https://www.facebook.com/share/v/19S8V8SnpV/

Зөвлөгөөнөөр аймгийн Засаг даргын тамгын газрын дарга П.Бүрэнжаргал өмнөх шуурхай зөвлөгөөнөөс өгсөн үүрэг даалгаврын хэрэгжилт, ажлын явцын талаар мэдээлэл хүргүүлж, аймгийн Засаг даргын орлогч, баяр наадмыг зохион байгуулах хорооны дарга Ц.Хүрэлбаатар аймгийн баяр наадам, хурдан морины бүсийн уралдааны бэлтгэл ажлын талаар танилцуулав.

Мөн ЗДТГ-ын БОНХОБТ-ийн хэлтсийн мэргэжилтэн Э.Мөнхзул худалдаа, үйлчилгээний байгууллагуудад хийсэн хяналт шалгалтын мэдээллийг танилцуулж, Монгол Улсын Засгийн газраас хэрэгжүүлж буй “Атар-4 тариалангийн тогтвортой хөгжлийн аян”-ы хүрээнд хэрэгжиж буй “Нутагтаа эзэн 100:1000” төслийн талаар Сайхан-Овоо сумын Засаг дарга Б.Арсланбаатар, Эрдэнэдалай сумын Засаг дарга С.Мөнхбаатар нар мэдээлэл өглөө.

Түүнчлэн Дэлгэрцогт сумын нутаг дэвсгэрт хууль бусаар алт олборлох үйл ажиллагаатай холбоотой зохион байгуулсан ажил, малын халдварт өвчний хорио цээрийн нөхцөл байдал, мал угаалга, туулгалтын ажил, ойрын 10 хоногийн цаг агаарын төлөв, баяр наадмын үеэр хурдан морины унаач хүүхдүүдийн аюулгүй байдлыг хангах чиглэлээр авч хэрэгжүүлж буй арга хэмжээний талаар холбогдох албаныхан танилцуулсан юм.

Шуурхай зөвлөгөөний үеэр аймгийн Засаг дарга С.Мөнхчулуун дараах үүрэг чиглэлүүдийг өглөө.

-Шатахуун түгээх станцуудын байгальд ээлтэй, эко ариун цэврийн байгууламжтай болох асуудлыг хууль, эрх зүйн хүрээнд судалж, холбогдох арга хэмжээ авах

-Аймгийн төвийн өнгө үзэмжийг сайжруулах зорилгоор албан байгууллагууд гадна орчны хашааг буулгах тохижилтын ажлыг зохион байгуулах

-Малын халдварт өвчин, хорио цээр, мал угаалга, туулгалтын ажлын хэрэгжилтэд аймгийн Мал эмнэлгийн газар болон сумдын удирдлагууд анхаарч, хариуцлагатай ажиллах

-Шатахуунтай холбоотой асуудлаар иргэдэд үнэн зөв мэдээлэл хүргэх, баяр наадмын амралтын үеэр олон хүн зорчсоноос үүссэн хомсдолыг бууруулах чиглэлээр шуурхай арга хэмжээ авах

-Малчдын өвс, тэжээлийн бэлтгэл, өвөлжилтийн бэлэн байдлыг хангах ажлыг эрчимжүүлэх, багийн дарга нараар дамжуулан зөвлөмж мэдээлэл хүргэх, аймаг болон сумын төвийн халаалт, дулааны бэлтгэлийг хангах

-Аймгийн баяр наадам зохион байгуулах бүх комисс, агентлагууд хариуцсан чиглэлийн ажлаа сайтар зохион байгуулж, цаг агаарын нөхцөл байдлаас үүдэх эрсдэлээс урьдчилан сэргийлэх, бэлэн байдлыг хангах

-Зам засварын ажилтай холбоотойгоор иргэдийн зорчих аюулгүй байдлыг хангаж, түр замын арчлалт, сайжруулалтын асуудлаар холбогдох байгууллагад санал хүргүүлэх

-Улаанбаатар–Мандалговь чиглэлийн авто замын засвар, арчлалтыг хариуцагч компаниудад шаардлага хүргүүлж, хэрэгжилтэд хяналт тавих

-Аялал жуулчлал болон баяр наадмын үеэр төв зам дагуух сумд замын цэвэрлэгээ, тохижилтын ажилд анхаарч, зам дагуух хоол үйлдвэрлэл, үйлчилгээ эрхлэгчдийн гадна орчны арчилгаа, хүнсний аюулгүй байдал, эрүүл ахуйн шаардлагыг хангуулж ажиллах

-Үйлчилгээний байгууллагуудын ажиллах цагийн хуваарьт эрт нээх үйлчилгээг нэвтрүүлэх, үйлчилгээний соёлыг сайжруулах чиглэлээр зөвлөмж, анхааруулга хүргүүлэх

-Наадмын худалдаа, үйлчилгээтэй холбоотой эрүүл ахуй, аюулгүй байдал, стандартын шаардлагыг хангуулж ажиллах

-Аймгийн төв болон хот хоорондын такси үйлчилгээний үнэ тариф, үйлчилгээний стандарт мөрдөлтөд хяналт тавьж, зөрчил гаргасан тохиолдолд хуульд нийцүүлэн хариуцлага тооцох

-Шонхор бариулахтай холбоотой асуудалд сумдын Засаг дарга нар байгаль орчны улсын байцаагчидтай хамтран хяналт тавьж ажиллах

-Мал угаалга, туулгалтын ажилд иргэд болон сумдын удирдлагууд хариуцлагатай оролцох

-Эрүүл мэндийн салбарт хүлээлгэн өгөх тоног төхөөрөмжийн хуваарилалт, зохион байгуулалтын ажлыг хийх

-Амралтын өдрүүдэд ажилласан албан хаагчдыг нөхөн амраах ажлыг зохион байгуулах