Монгол Улсын Засгийн газрын Хэрэг эрхлэх газраас өвөлжилтийн бэлтгэл, бэлэн байдлыг хангах асуудлаар цахим хурал зохион байгууллаа. Хурлыг Монгол Улсын Ерөнхий сайд Н.Учрал удирдан явуулж, Засгийн газрын гишүүд, холбогдох байгууллагын удирдлагууд оролцов.

Тус хуралд аймгийн Засаг дарга С.Мөнхчулуун, Засаг даргын тамгын газрын дарга П.Бүрэнжаргал, Төрийн захиргааны удирдлагын хэлтсийн дарга Н.Эрдэнэ-Очир, БОНХОБТ хэлтсийн ахлах мэргэжилтэн Ж.Уянга болон холбогдох байгууллагын удирдлагууд оролцож, аймгийн өвөлжилтийн бэлтгэл ажлын явц, цаашид авч хэрэгжүүлэх арга хэмжээний талаар мэдээлэл солилцлоо.

Хурлаар өвөлжилтийн бэлтгэл, бэлэн байдлыг эрчимжүүлэх хүрээнд өвс, тэжээл, мах, түлш, шатахууны нөөцийг бүрдүүлэх, отрын бүсийн зохион байгуулалтыг сайжруулах, сургууль, цэцэрлэгийн нүүрс, түлшний хангамжийг хангах, улсын болон орон нутгийн авто замын өвлийн бэлэн байдлыг бүрдүүлэх, болзошгүй цаг агаарын эрсдэлээс урьдчилан сэргийлэх арга хэмжээг эрчимжүүлэх асуудлыг хэлэлцэж, аймаг, нийслэлийн удирдлагуудад холбогдох үүрэг, чиглэл өгөв.

Монгол Улсын Ерөнхий сайд Н.Учрал дулаан, эрчим хүчний байгууллагуудын засвар, шинэчлэлийн ажлыг 2026 оны 09-р сарын 1-ний өдрийн дотор бүрэн дуусгаж, өвөлжилтийн үед шаардагдах түлш, шатахуун болон стратегийн нөөцийг бүрэн бүрдүүлэх, мөн малын төлөвлөгөөт вакцинжуулалтыг 2026 оны 09-р сарын 15-ны өдрийн дотор бүрэн хэрэгжүүлэхийг үүрэг болголоо.

Мөн отроор өвөлжиж буй малчдад харьяалал үл харгалзан эрүүл мэндийн тусламж, үйлчилгээг шуурхай, хүртээмжтэй хүргэх, өвөлжилтийн бэлтгэл, бэлэн байдлын хэрэгжилтэд тогтмол хяналт тавьж, явцыг 7 хоног бүр нэгтгэн дүгнэж ажиллахыг аймаг, нийслэл болон холбогдох байгууллагын удирдлагуудад үүрэг болгож, өвөлжилтийн бэлтгэл ажлыг хугацаанд нь чанартай ханган ажиллах чиглэл өгсөн юм.