Тус чуулганыг Улсын Их Хурлын Хүний хөгжил, нийгмийн бодлогын байнгын хорооноос УИХ-ын 2026 оны 95 дугаар захирамжаар байгуулагдсан ажлын хэсгийн үйл ажиллагааны хүрээнд ахмад настны хөдөлмөр эрхлэлт, нийгмийн хамгаалал, эрүүл мэндийн үйлчилгээний асуудлаар санал, дүгнэлт боловсруулах зорилгоор зохион байгуулсан юм.
Чуулганд УИХ-ын гишүүн, ажлын хэсгийн ахлагч С.Эрдэнэбат, ажлын хэсгийн гишүүд, холбогдох байгууллагын төлөөлөл, Дундговь, Дорноговь, Өмнөговь, Говьсүмбэр аймгийн удирдлагууд болон Дундговь аймгийн 15 сумын 160 гаруй ахмад настны төлөөлөл цахимаар оролцов.
Чуулганы үеэр аймгийн Засаг даргын орон тооны зөвлөх Б.Лхагвабаатар “Дундговь аймгийн ахмад настны тулгамдаж буй асуудал, хийж хэрэгжүүлсэн ажлын танилцуулга” сэдвээр мэдээлэл хийлээ.
Мөн чуулганд оролцсон ахмад настнууд аймагт ахмадын сувилал байгуулах, ахмад настны амралт, сувиллын эрхийн бичгийн квотыг нэмэгдүүлэх, ахмадын хөдөлмөр эрхлэлтийг дэмжих, тэтгэвэр тогтоох аргачлалыг боловсронгуй болгох зэрэг асуудлаар санал, хүсэлтээ ажлын хэсэгт уламжилж, холбогдох асуудлаар мэдээлэл, хариулт авсан юм.
Чуулганы төгсгөлд УИХ-ын гишүүн, ажлын хэсгийн ахлагч С.Эрдэнэбат гарсан санал, хүсэлтийг нэгтгэн танилцуулж, тэдгээрийг цаашид бодлогын түвшинд судлан, шийдвэрлэх чиглэлээр ажиллахаа илэрхийллээ.
