🔹Хөдөлмөрийн салбарын хүний нөөцийг хөгжүүлэх, албан хаагчдын чадавхыг бэхжүүлэх зорилтын хүрээнд хөдөлмөр эрхлэлтийн чиглэлээр ажиллаж буй албан хаагчдын мэргэжил дээшлүүлэх сургалтын хэрэгцээг тодорхойлох, түүнд үндэслэн дотоод болон гадаад сургалтын хөтөлбөр боловсруулах ажил албан ёсоор эхэллээ.

🔹Тус ажлын хүрээнд захиалгат судалгааны зорилго, зорилт, хүлээгдэж буй үр дүн, хэрэгжүүлэх үйл ажиллагааны үе шат, хугацааны төлөвлөгөөг “Монголын эдийн засгийн академи” НҮТББ-ын тэргүүн, профессор Х.Батцэнгэл (Sc.D), судлаач, дэд профессор Т.Бат-Эрдэнэ (Ph.D) нар танилцуулж, сургалтын хэрэгцээг тодорхойлох судалгааны асуулгын бүтэц, арга зүй, бөглөх зааварчилгаа өгч асуулгын урьдчилсан туршилтыг зохион байгууллаа. Туршилтад оролцсон албан хаагчид асуулгыг бөглөж, асуулгын агуулга, ойлгомжтой байдал, хэрэглээний талаар санал, зөвлөмжөө өгсөн юм. Туршилтын судалгаанд Хүн ам, хөдөлмөр, нийгмийн хамгааллын сургалт, судалгааны хүрээлэнгийн удирдлага, албан хаагчид хамрагдлаа.

🔹Үүнээс гадна хөдөлмөр эрхлэлтийн салбарын чадамжийн хүрээ, мэргэжил дээшлүүлэх сургалтын үндсэн чиглэл, хөтөлбөрийн ерөнхий агуулгыг танилцуулж, оролцогчдын дунд хэлэлцүүлэг өрнүүлэн асуулт, хариулт, санал солилцлоо.

🔹Цаашид судалгааны үр дүнд үндэслэн салбарын албан хаагчдын хэрэгцээ, шаардлагад нийцсэн сургалтын цогц хөтөлбөрийг боловсруулж, хүний нөөцийн хөгжлийн тогтолцоог бэхжүүлэхэд чиглэсэн хамтын ажиллагааг өргөжүүлэхээр төлөвлөж байна.

🔹Арга хэмжээний төгсгөлд оролцогч талууд цаашдын хамтын ажиллагааны чиглэл, дараагийн алхмуудын талаар санал солилцож, ажлын төлөвлөгөөг хэрэгжүүлэхэд нягт хамтран ажиллахаар тохиролцов.