Жил бүрийн 6 дугаар сарын 14-ний өдөр “Хүмүүнлэг сэтгэлээр цусаа өгч, амьдрал бэлэглэе!” уриатайгаар дэлхий нийтээрээ сайн дурын, авлагагүй цусны доноруудынхаа хүмүүнлэг үйлсийг алдаршуулан, талархал илэрхийлэх зорилгоор “ЦУСНЫ ДОНОРЫН ДЭЛХИЙН ӨДӨР”-ийг тэмдэглэн өнгөрүүлж байна

Энэ өдрийг цус, цусан бүтээгдэхүүн шаардлагатай өвчтөнүүдийг аюулгүй, чанартай, хүрэлцээтэй цус, цусан бүтээгдэхүүнээр хангахын ач холбогдлыг олон нийтэд сурталчлан таниулах, сайн дурын донорын эгнээг өргөжүүлэх зорилгоор тэмдэглэн өнгөрүүлдэг билээ.

Хүмүүнлэг энэрэнгүй, сайн дурын доноруудын бэлэглэсэн цус нь жирэмслэлт болон төрөлттэй холбоотой их хэмжээний цус алдалт, хүүхдийн хүнд хэлбэрийн цус багадалт, осол гэмтэл, нарийн төвөгтэй мэс засал эмчилгээний үед хүний амь насыг аврах үнэт хувь нэмэр болдог. Түүнчлэн хадуур эст цус багадалт, талассеми, гемофили болон бусад архаг өвчтэй хүмүүсийн урт хугацааны эмчилгээ, амьдралын чанарыг дэмжихэд чухал ач холбогдолтой юм.

Цус бол орлуулшгүй амьдралын эх булаг. Нэг удаагийн цусаа хандивласнаар гурван хүний амь насыг аврах боломжтой.