Ховд аймгийн Н.Баасанжавын нэрэмжит Бүсийн Оношлогоо, Эмчилгээний Төв болон АНУ-ын International Medical Exchange Group (IMEG)-ийн хамтын ажиллагааны хүрээнд 2026 оны 6 дугаар сарын 15-19-ний өдрүүдэд "Олон улсын эрүүл мэндийн солилцооны хөтөлбөр-2026" амжилттай хэрэгжлээ.
Тус хөтөлбөрт АНУ-аас ирсэн эмч, сувилагч, эрүүл мэндийн мэргэжилтнүүд болон БОЭТ, өрхийн эрүүл мэндийн төвийн эмч, ажилтнууд хамтран оролцож, иргэдэд чанартай эрүүл мэндийн тусламж үйлчилгээ хүргэхийн зэрэгцээ эмч, мэргэжилтнүүдийн мэдлэг, ур чадварыг дээшлүүлэх чиглэлээр олон талт үйл ажиллагаа зохион байгуулсан.
Хөтөлбөрийн хүрээнд АНУ-ын эмч, мэргэжилтнүүд БОЭТ-ийн тасаг нэгжүүд, Жаргалант, Буянт, Хайрхан өрхийн эрүүл мэндийн төвүүд, Дөргөн сум болон Хөгжлийн бэрхшээлтэй хүний хөгжлийн төвд ажиллаж, зүрх судлал, мэдрэл судлал, хүүхэд, дотрын чиглэлээр нарийн мэргэжлийн үзлэг, зөвлөгөө, оношлогоо хийж, хөгжлийн бэрхшээлтэй иргэд, асрамжийн газрын ахмад настнуудад эрүүл мэндийн үйлчилгээ үзүүлж, эрчимт эмчилгээ, эмгэг судлал, лаборатори, зүрх судлал, мэдрэл судлалын чиглэлээр туршлага солилцож, сургалт, лекц, хэлэлцүүлэг зохион байгуулан орон нутгийн эрүүл мэндийн ажилтнуудын мэдлэг, ур чадварыг дээшлүүлэхэд үнэтэй хувь нэмэр оруулсан.
Хөтөлбөрийн хугацаанд нийт 950 гаруй иргэнд эрүүл мэндийн үзлэг, зөвлөгөө үйлчилгээнд хамрагдаж, орон нутгийн иргэдэд олон улсын түвшний эрүүл мэндийн тусламж үйлчилгээг ойртуулан хүргэж ажиллаа.
Энэхүү эрүүл мэндийн солилцооны хөтөлбөр нь олон улсын сайн туршлагыг нутагшуулах, эмч мэргэжилтнүүдийн хамтын ажиллагааг өргөжүүлэх, иргэдэд үзүүлэх эрүүл мэндийн тусламж үйлчилгээний чанар, хүртээмжийг нэмэгдүүлэхэд чухал ач холбогдолтой арга хэмжээ боллоо.
Хөтөлбөрийг амжилттай хэрэгжүүлэхэд хамтран ажилласан ХОВД АЙМГИЙН ИРГЭДИЙН ТӨЛӨӨЛӨГЧДИЙН ХУРАЛ, International Medical Exchange Group (IMEG)-ийн хамт олон, Ховд аймгийн Эрүүл мэндийн газар, өрхийн эрүүл мэндийн төвүүд, Дөргөн сумын Эрүүл мэндийн төв болон дэмжин оролцсон нийт байгууллага, эмч мэргэжилтнүүд, иргэддээ талархал илэрхийлж байна.
💙 Эрүүл иргэн – Эрүүл Ховдын төлөө хамтдаа.
