Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв Дэлхийн банк группын төлөөлөгчдийг хүлээн авч уулзав.
Уулзалтын эхэнд Төрийн нарийн бичгийн дарга Б.Дашпүрэв Засгийн газар ажлаа эхлээд 100 хонож байгаа ч Засгийн газрын үйл ажиллагааны хөтөлбөр, Монгол Улсын хөгжлийн бодлогын баримт бичгүүдэд тусгагдсан ажлуудыг хэрэгжүүлэхээр зорин ажиллаж байгааг тэмдэглэв.
Аж үйлдвэр, эрдэс баялгийн яамны зүгээс уул уурхай, эрдэс баялгийн салбарын хууль эрх зүйн орчныг сайжруулах, эдийн засгийг тэтгэгч уул уурхайн салбарын дүрэм журмыг шинэчлэх, ялангуяа уул уурхайн төслүүдийн зураг төсөл зохиох, ТЭЗҮ боловсруулах хүрээнд олон улсын жишигт нийцсэн, мэргэжлийн уул уурхайн, зураг төслийн чанартай, эдийн засгийн үр ашгийг бодитоор тооцох боломжтой нэгдсэн аргачлалыг шинээр боловсруулах зайлшгүй шаардлагатай байгааг онцлоод энэ чиглэлд Дэлхийн банктай хамтран ажиллах, техникийн туслалцаа авах хүсэлтэй байгаагаа илэрхийллээ.
Дэлхийн банк группын төлөөлөгч, хатагтай Вэнтин Вэй үйл ажиллагааны талаар товч танилцуулаад Төрийн нарийн бичгийн даргаас хамтран ажиллах санал гаргасны дагуу уул уурхайн төслийн зураг төсөл, ТЭЗҮ-тэй холбоотой аргачлалыг олон улсын жишиг загварт нийцүүлэн шинэчлэн боловсруулах, судалгаа хийх, үр дүнгийн тайлан гаргасны үндсэн дээр зөвлөмж боловсруулах, техникийн туслалцаа үзүүлэх чиглэлд Аж үйлдвэр, эрдэс баялгийн яамтай хамтран ажиллах боломжтой гэдгээ илэрхийлэв.
Тус баг нь хувийн хэвшлийн салбарын судалгааг Олон улсын санхүүгийн корпорацийн хамт хэрэгжүүлдэг ба бизнесийн орчин нөхцлийг сайжруулах, аж ахуйн нэгжүүдийн бүртгэл, зөвшөөрөл авахтай холбоотой үйл ажиллагааг хөнгөвлөх, хялбарчлах чиглэлээр судалгаа хийх, зөвлөмж гаргах зэрэг техникийн дэмжлэг үзүүлдэг байна.
