ERASMUS+ RETEACH буюу "Монгол Улсын багш бэлтгэх боловсролын хөтөлбөрийг ногоон болон дижитал шилжилтэд нийцүүлэн шинэчлэх" төслийн хүрээнд “Сургалтын хөтөлбөр болон сургалт, суралцахуйн шинэлэг арга зүйн чадавхыг бэхжүүлэх сургалт 06 дугаар сарын 02-06-ны өдрүүдэд Улаанбаатар хотод зохион байгуулагдаж байна.
“Монгол Улсын багш бэлтгэх боловсролын хөтөлбөрийг ногоон болон дижитал шилжилтэд нийцүүлэн шинэчлэх" төслийн ерөнхий зохицуулагчаар Отгонтэнгэр Их Сургууль ажиллаж байгаа бөгөөд Боловсролын яам, Боловсролын ерөнхий газар, Боловсролын судалгааны үндэсний хүрээлэн, Румын улсын Брасов дахь Трансилваний Их Сургууль, Италийн Палермогийн их сургууль, Итали улсын Боловсролын хамтын ажиллагааны байгууллага CESIE, Монгол Улсын Боловсролын Их Сургууль, МУИС-ийн Зүүн Бүсийн Сургууль, Хангай Дээд Сургууль, Дархан Дээд Сургууль төслийг хамтран хэрэгжүүлж байна.
Энэ удаагийн сургалтын үндсэн хүлээн авагч сургуулиар Монгол Улсын Боловсролын Их Сургууль ажиллаж байна.
Боловсролын ерөнхий газар төслийн түншлэгч байгууллагаар хамтран ажиллаж байгаа бөгөөд Сургалтын хөтөлбөрийн хэрэгжилт, үнэлгээний хөгжлийн газрын дарга Б.Лхагвабаяр, ахлах мэргэжилтэн А.Цэнгүүнжаргал, мэргэжилтэн Н.Болорцэцэг нар төлөөлөн оролцож, багшийн мэргэжил дээшлүүлэх сургалтын агуулга, арга зүйг ногоон болон дижитал хэлбэрт шилжүүлэх, турших үйл ажиллагааны талаар танилцуулж, хэлэлцүүлэг өрнүүлнэ.
Төслийн үр дүнд Европын багшийн боловсролын бодлого, сургалтын шинэ аргачлалаас суралцаж, багшийн мэргэжлийн тасралтгүй хөгжлийн шилдэг туршлагыг Монгол Улсад нутагшуулах юм.
Төслийн хүрээнд чадавх бэхжүүлэх сургалтууд цувралаар зохион байгуулагдаж байгаа бөгөөд өмнө нь Итали улсын Палермо хотод хоёр удаа зохион байгуулагдсан сургалтууд болон ногоон болон дижитал шилжилтэд чиглэсэн багш боловсролын бодлого, Европын холбооны сайн туршлагыг судлах, бодит практикт хэрхэн нэвтрүүлэхэд чиглэсэн кейс практикт чиглэсэн байна. Энэ удаагийн сургалт МУБИС дээр зохион байгуулагдаж байгаа бөгөөд төслийн хүрээнд сайжруулан шинэчилж байгаа багш бэлтгэх хөтөлбөрүүдийг хэрэгжүүлэх, туршихад бэлтгэх сургалтын арга зүйд чиглэж байгаагаараа онцлог байна.
Сургалтад танхим болон цахимаар шинэчилсэн хөтөлбөрөө хэрэгжүүлэх багш нар болон төслийн хамтрагч 80 гаруй оролцогчид оролцож байна.
Тус арга хэмжээний нээлтийн үйл ажиллагаанд МУБИС-ийн ректор, доктор, профессор Ж.Батбаатар, Отгонтэнгэр их сургуулийн ректор доктор Н.Энхзаяа, Европын холбооны Монгол дахь төлөөлөгчийн газрын элчин сайд Ина Марчюлёните нар уригдан оролцлоо.
Энэ хүрээнд Европын холбооны сургагч багшаар:
🔹Румыны Брасов дахь Трансилваний Их Сургуулийн Профессор Daniela Popa, Профессор Codruta Jaliu
🔹Италийн Палермогийн их сургуулийн профессор Elena Mignosi, профессор Antonella D’Amico, Eliana Danzi
🔹Боловсролын хамтын ажиллагааны байгууллага CESIE-ийн Federico Mallei, Rita Quisillo нар таван өдрийн турш монголын багш нарт хичээл зааж, сургалтыг удирдан явуулах юм.
👉Уулзалт, сургалтын үр дүнд:
✅Чадамжид суурилсан хөтөлбөрийн дизайн зарчмыг ашиглан багш боловсролын хөтөлбөрийг “Багшийн ногоон болон дижитал чадамжийн хүрээ”-тэй нийцүүлэн шинэчлэх
✅GreenComp болон DigComp хүрээг хөтөлбөрийн суралцахуйн үр дүн, хичээлийн бүтцэд нэгтгэх
✅Оюутан төвтэй, дижиталаар дэмжигдсэн, тогтвортой хөгжилд чиглэсэн заах, суралцах үйл ажиллагаа боловсруулах
✅Шинэчилсэн хөтөлбөрт зориулан чадамжид суурилсан үнэлгээний арга, чанарын баталгаажуулалтын хяналтын шалгуур үзүүлэлт боловсруулах
✅Шинэчилсэн багш боловсролын хөтөлбөрийн дадлага ба менторшипийн бүрэлдэхүүн хэсгийг бэхжүүлэх зэрэг ур чадварт суралцах юм.
#ERASMUS+RETEACH “Монгол Улсын багш бэлтгэх боловсролын хөтөлбөрийг ногоон болон дижитал шилжилтэд нийцүүлэн шинэчлэх” төсөл.
