✅Гаалийн байгууллагаас иргэн, аж ахуйн нэгжүүдэд бараагаа өөрөө мэдүүлэх боломжийг олгосны дүнд бодит үр дүнгүүд гарсаар байна.

Өнгөрсөн оны байдлаар гаалийн байгууллагын хэмжээнд нийт 1.1 сая орчим гаалийн мэдүүлгээр бүрдүүлэлт хийснээс 499.7 мянга орчим мэдүүлэг буюу 42.2 хувь нь иргэн, аж ахуйн нэгж цахимаар өөрөө мэдүүлээд байна. Үүнээс импортын барааны 12.3 хувь, экспортын барааны 87.6 хувийг цахимаар өөрөө гаалийн байгууллагад мэдүүлжээ.

Гаалийн мэдүүлэг бичих төлбөрийг зах зээлийн дундаж үнээр тооцоход гаалийн зуучлагч байгууллагад төлөх байсан 14.9 тэрбум орчим төгрөгийг иргэн, аж ахуйн нэгжүүд хэмнээд байна.

✅Цахимаар өөрөө мэдүүлэх нь мэдүүлэх зардал хэмнэхээс гадна бүрдүүлэлтэд зарцуулах цаг хугацаа хэмнэх, гаалийн байгууллагын үйлчилгээг хурдан шуурхай авах боломжийг бүрдүүлж байгаа юм.

Иймд иргэн, аж ахуйн нэгж та бүхэн DAN системээр /e-mongolia нэвтрэхэд ашигладаг систем/ болон тоон гарын үсэг ашиглан gaali.mn системд нэвтэрч, нэмэлт зардалгүйгээр гаалийн мэдүүлгийг цахимаар өөрөө мэдүүлэх боломжтой.