Дэлхийн Банкны БНСУ, БНХАУ, Монгол Улс дахь үйл ажиллагааг хариуцсан дарга Ларс Кристиан Муллер тэргүүтэй төлөөлөгчид Монгол Улсын Засгийн газрын дижитал бодлогыг дэмжихэд чухал ач холбогдол бүхий, Дэлхийн Банкнаас санхүүжүүлж буй “Ухаалаг Засаг” төслийн хэрэгжилттэй газар дээр нь танилцах зорилгоор Үндэсний Дата төвд албан айлчлал хийлээ.
Айлчлалын хүрээнд Үндэсний дата төвөөс “Ухаалаг Засаг I” болон “Ухаалаг Засаг II” төслийн хүрээнд хэрэгжүүлсэн болон хэрэгжүүлж буй ажлууд, төрийн мэдээллийн системүүдийн найдвартай, тасралтгүй ажиллагааг хангах дэд бүтэц, дата төвийн техникийн хүчин чадлыг нэмэгдүүлэх, аюулгүй байдал, тогтвортой ажиллагааг хангах чиглэлээр авч хэрэгжүүлж буй арга хэмжээнүүдийг дэлгэрэнгүй танилцууллаа.
“Ухаалаг Засаг” төслийн хүрээнд “Үндэсний дата төв”-ийн дэд бүтцийг бэхжүүлэхэд чиглэсэн энэхүү хөрөнгө оруулалт нь төрийн байгууллагууд дэд бүтцийн нэмэлт зардал гаргахгүйгээр цахим систем нэвтрүүлэх, мэдээллийн аюулгүй байдлыг хангах, цахим үйлчилгээний чанар, хүртээмжийг улсын хэмжээнд сайжруулах суурь нөхцөлийг бүрдүүлж, цахим шилжилтийг эрчимжүүлж байгааг онцоллоо. Үүний үр дүнд иргэд, аж ахуйн нэгжүүд төрийн цахим үйлчилгээг илүү хүртээмжтэй, шуурхай, найдвартай авах боломж бүрдэж байна.
