Монгол Улсын Шадар сайд Н.Номтойбаяр Онцгой байдлын ерөнхий газарт ажиллах үеэрээ “Ажиллагааны шуурхай штаб”-т ажиллаж, цаг үеийн нөхцөл байдал, авч хэрэгжүүлж байгаа арга хэмжээ, төлөвлөлттэй танилцаж, үүрэг чиглэл өглөө.

ОБЕГ-ын даргын тушаалаар УОК-ын II хурлын тэмдэглэл, 01 дүгээр тогтоолын хэрэгжилтийг хангах, болзошгүй гамшиг, аюулт үзэгдлээс урьдчилан сэргийлэх, хариу арга хэмжээг шуурхай хэрэгжүүлэх, нийслэл, аймгийн шуурхай штабыг нэгдсэн удирдлага, зохион байгуулалтаар хангах үүрэг бүхий Ажиллагааны удирдлагын Шуурхай штабыг байгуулан ажиллаж байгаа юм. Тухайлбал, улсын хэмжээнд (2026.04.06) нийслэлийн Баянзүрх, Хан-Уул, Ховд аймгийн Мянгад, Дөргөн, Хэнтий аймгийн Өмнөдэлгэр, Хэрлэн, Галшар, Баян-Овоо, Дадал, Булган аймгийн Сэлэнгэ, Архангай аймгийн Жаргалант, Ихтамир, Сэлэнгэ аймгийн Хүдэр, Дорнод аймгийн Баян-Уул, Баяндун, Булган, Халхгол, Хөвсгөл аймгийн Ханх, Түнэл, Сүхбаатар аймгийн Уулбаян, Сүхбаатар, Эрдэнэцагаан, Түмэнцогт суманд 25 удаагийн ой, хээрийн гал түймэр бүртгэгдсэн байна.

Дээрх түймэрт ойн 704 га, хээрийн 58.615 га нийт 59.319 га талбай өртөж, түймрийн аюулаас 26 гэр, 19 өвөлжөө, хашаа саравч авран хамгаалж, 3 айл өрхийн 8 иргэн, 2000 орчим малыг нүүлгэн шилжүүлжээ.

Түймэр унтраах ажиллагаанд Онцгой байдлын байгууллага, Хил хамгаалах байгууллага, Цагдаагийн байгууллагын алба хаагчид болон орон нутгийн иргэд, нийт нийт 1079 хүн, 172 автомашинтай ажилласан гэдгийг танилцууллаа. Ажиллагааны шуурхай штаб нь гамшгаас хамгаалах улсын алба, яам, агентлаг, аймаг, сум, дүүргийн Онцгой комиссын үйл ажиллагаанд мэргэжил, аргазүйн дэмжлэг үзүүлж, удирдлага, зохион байгуулалтаар хангаж, гамшиг, аюулт үзэгдэл, ослоос урьдчилан сэргийлэх, хүн, хүч, хэрэгслийг тодотгож, томилгоожуулах, үүссэн нөхцөл байдалд үнэлгээ, дүгнэлт хийж, шийдвэр гаргах арга хэмжээг хэрэгжүүлэх юм. Энэ хүрээнд ой, хээрийн түймрийн нөхцөл байдалтай уялдуулан шуурхай арга хэмжээг авч, байгууллага хоорондын уялдаа холбоог ханган ажиллаж байна. Мөн тэрээр ОБЕГ-ын дэргэдэх 119 дүгээр ангийн үйл ажиллагаа болон гамшиг, осол, газар хөдлөлтийн мэдээ, мэдээлэл, иргэд, олон нийтэд хүргэж байгаа сэрэмжлүүлэг мэдээллийн хүртээмжийн талаарх мэдээлэлтэй танилцлаа.