Сургуулийн өмнөх болон ерөнхий боловсролын тухай хууль: 4.7 Малчин эцэг, эх, асран хамгаалагч, харгалзан дэмжигчийн хүсэлтийн дагуу тухайн онд найман нас хүрэх хүүхдийг ерөнхий боловсролын сургуульд элсүүлэн суралцуулж болно. 4.8 Энэ хуулийн 4.7-д зааснаар сурч байгаа малчин өрхийн хүүхдийн нэг, хоёрдугаар ангийн сургалтыг эцэг, эх, асран хамгаалагч, харгалзан дэмжигчийн хүсэлтээр Боловсролын ерөнхий хуулийн 26.1.11-д заасан журмыг баримтлан зайн болон цахим сургалтад хамруулна. 4.9 Энэ хуулийн 4.8-д заасан зайн болон цахим сургалтад хамрагдсан малчин өрхийн хүүхдийг гуравдугаар ангиас эхлэн танхимын сургалтад үргэлжлүүлэн сургана. 4.10 Энэ хуулийн 4.7, 4.8, 4.9-д заасан малчин өрхийн хүүхдийг ерөнхий боловсролын сургуульд элсүүлэн сургах, сургалтыг энэ хэлбэрээр зохион байгуулах журмыг боловсролын асуудал эрхэлсэн Засгийн газрын гишүүн батална. 2 дугаар зүйл: Сургуулийн өмнөх болон ерөнхий боловсролын тухай хуулийн 4 дүгээр зүйлийн 4.7 дахь хэсгийн 4.6 гэсний дараа 4.7, 4.8 гэж нэмсүгэй. 3 дугаар зүйл: Сургуулийн өмнөх болон ерөнхий боловсролын тухай хуулийн 4 дүгээр зүйлийн 4.7, 4.8 дахь хэсгийн дугаарыг “4.11, 4.12” гэж тус тус өөрчилсүгэй.