Гэр бүлийн хүчирхийлэл: Эхнэр, нөхөр, гэр бүлийн бусад гишүүн, хамтран амьдрагч, асран хамгаалагч, харгалзан дэмжигч, тэдний асрамж, хамгаалалтад байгаа хүн, тухай гэр бүлд хамт амьдарч байгаа хүн болон тусдаа амьдарч байгаа төрүүлсэн, үрчлэн авсан хүүхэд, төрсөн, үрчлэн авсан эцэг, эх, ах, эгч, дүү, гэрлэлтээ цуцлуулсан эхнэр, нөхөр, хамтран амьдарч байсан, эсхүл хамтран амьдарч байгаагүй ч гэр бүлийн харилцаатай байсан, дундаасаа хүүхэдтэй этгээд нь нөгөө хүнийхээ сэтгэл санаанд дарамт учруулах, эдийн засаг, бэлгийн эрх чөлөө, бие махбодод халдсан үйлдэл, эс үйлдэхүйг гэр бүлийн хүчирхийлэл хэлнэ.

Хохирогч: Гэр бүлийн хүчирхийллийн улмаас сэтгэл санааны дарамт, эдийн засаг, бие махбод, бэлгийн халдашгүй байдлаараа хохирсон хүнийг хэлнэ.

Хохирогчийн эрх:

- Гэр бүлийн хүчирхийлэлд өртсөн талаар аль ойр байгаа цагдаагийн байгууллагад хандаж, амь нас, эрүүл мэнд, аюулгүй байдлаа хамгаалуулах, сум, хорооны хамтарсан багаас тусламж авах, өөрт хамааралтай асуудлаар шийдвэр гаргахад оролцож санал өгөх, гаргасан шийдвэрт гомдол гаргах, Гэр бүлийн хүчирхийлэлтэй тэмцэх тухай хууль болон бусад хуульд заасан тусламж үйлчилгээг үнэ төлбөргүй авах эрхтэй.

- Гэрч, хохирогчийг хамгаалах тухай хуульд зааснаар гэмт хэрэг хянан шийдвэрлэх явцад амь нас, эрүүл мэндэд аюул учирч болзошгүй үед аюулгүй байдлын болон сэтгэл зүйн хамгаалалтад хамрагдах, мэдээллээр хангагдах, мэдээлэл задрахаас хамгаалагдах, өмч болон ажлын байраа хадгалуулах үйлчилгээг үнэ төлбөргүй авах эрхтэй.

- Та Зөрчил шалган шийдвэрлэх тухай хууль болон Эрүүгийн хэрэг хянан шийдвэрлэх тухай хуульд зааснаар өөрийгөө өмгөөлөх, өмгөөлүүлэх, хууль зүйн туслалцаа авах, хэргийн бодит байдлыг тогтооход шаардлагатай эд зүйл, баримт бичиг, мэдээлэл, бусад баримтыг гаргаж өгч хавтаст хэрэгт бэхжүүлж тусгуулах, мөрдөн шалгах тодорхой ажиллагаа явуулах, нотлох баримт шалгуулах хүсэлт гаргах, шүүх, прокурор, мөрдөгчийн ажиллагаа, шийдвэрт энэ хуульд заасан журмын дагуу гомдол гаргах, эх хэлээрээ, эсхүл сайн мэдэх хэлээрээ мэдүүлэг өгөх, орчуулагч, хэлмэрч авах, гэмт хэргийн улмаас учирсан хохирол, хор уршгийг нэхэмжлэх, нөхөн төлүүлэх хүсэлт гаргах, шүүгч, прокурор, мөрдөгч, орчуулагч, хэлмэрч, шинжээч, мэргэжилтэн, шүүх хуралдааны нарийн бичгийн даргыг татгалзан гаргах тухай хүсэлт гаргах зэрэг эрхтэй.

Та төрийн байгууллага, албан тушаалтнаас дараах үйлчилгээг үнэ төлбөргүй авах эрхтэй:

1.Аюулгүй байдлын хамгаалалт;

2. Эмнэлгийн тусламж, үйлчилгээ;

3. Сэтгэл зүйн үйчилгээ;

4. Нийгмийн халамжийн үйлчилгээ;

5. Хүүхэд хамгааллын үйлчилгээ;

6. Эрх зүйн туслалцаа;

7. Холбон зуучлах.

Цагдаагийн алба хаагч нь гэр бүлийн хүчирхийллийн талаарх дуудлага, мэдээллийг хүлээн авмагц шуурхай арга хэмжээ авч, хохирогчийн амь нас, эрүүл мэнд, аюулгүй байдлыг нэн тэргүүнд ханган ажиллана. Мөн дараах үүргийг хүлээнэ. Үүнд:

Хохирогч болон хүүхдийн амь нас, эрүүл мэнд, аюулгүй байдалд учирсан, эсхүл учирч болзошгүй эрсдэлийг тогтоох зорилгоор аюулын зэргийн үнэлгээ хийж, шаардлагатай хамгаалалтын арга хэмжээг шуурхай авна.

Хохирогчийг хүчирхийлэл үйлдэгчээс тусгаарлах, аюулгүй газар хүргэх, шаардлагатай тохиолдолд түр хамгаалах байр, нэг цэгийн үйлчилгээний төв болон холбогдох байгууллагад хүргэнэ.

Хохирогчид эмнэлгийн яаралтай тусламж шаардлагатай тохиолдолд эмнэлгийн байгууллагад хүргэх, шаардлагатай арга хэмжээг авч ажиллана.

Хохирогчийг орон байрнаасаа хувцас, эм, эмнэлгийн хэрэгсэл, хувийн болон иргэний баримт бичиг, хүүхдийн сургалтын хэрэгсэл, өдөр тутмын зайлшгүй шаардлагатай хэрэглээний эд зүйлээ авахад нь туслалцаа үзүүлж, шаардлагатай тохиолдолд хүчирхийлэл үйлдэгчээс шаардан гаргуулна.

Танд туслах байгууллага, албан тушаалтан:

- Сум, хорооны Засаг дарга, хамтарсан баг,

- Цагдаагийн байгууллага 102

- Түр хамгаалах байр утас 107, 94601666

- Хүүхдийн тусламжийн утас 108

- Гэмтэл согог судлалын үндэсний төвийн Нэг цэгийн үйлчилгээний төв 77115111,

- Сүхбаатар дүүргийн Эрүүл мэндийн төвийн дэргэдэх Нэг цэгийн үйлчилгээний төв 77057700

- Шүүхийн шинжилгээний үндэсний хүрээлэнгийн Шүүх эмнэлгийн Нэг цэгийн үйлчилгээний төв (+976)51264018, 70004022

- Хүчирхийллийн эсрэг үндэсний төв 96490505, 70119949