Ярилцсан дэслэгч А.БИЛЭГТ

Сонсогч олонд “Ёодэл” дуугаараа танигдаж, анхны цомгоо “Ёодэл” нэртэйгээр өлгийдөн авснаас хойш 12 дахь жилдээ уран бүтээлээ туурвиж буй дуучин П.Баярцэнгэлийг энэ удаагийн “Дугаарын ярилцлага” буландаа урилаа. Тэрбээр “Эх орныхоо энхийн манаанд зогсох их хувь заяаны эзэд хилчин дайчдадаа зориулав” хэмээсэн “Санан санах алс” дуугаа бүтээгээд удаагүй байгаа юм. Түүний хувьд есдүгээр сарын 06-нд Төв цэнгэлдэх хүрээлэнд бие даасан уран бүтээлийн хоёр дахь “Хайр эзэнтэй” амьд хөгжмийн тоглолтоо толилуулах гэж байна. Ийнхүү олон ажил давхацсан тоглолтынх нь бэлтгэлийн үеэр бид цөөн хором уулзсан билээ.

-Таны сүүлд гаргасан “Санан санах алс” дууны клипэнд хилчдийн ажил, амьдралын талаар олон зүйлийг харуулсан байна билээ. Шинэхэн уран бүтээлээрээ хилчидтэйгээ мэндчилж, цаг гарган ярилцаж байгаад баярлалаа.

-“Эх орны манаа” сонины уншигч хилчдэдээ энэ өдрийн мэндийг хүргэе. Би багаасаа л хил, хилчидтэй ойр байж ирсэн. Хүүхэд байхдаа зун болгон Хилийн цэргийн 0132 дугаар ангийн 0127 дугаар салбарт очдог байлаа. Тэнд миний том эгч ажиллаж, амьдардаг байсан учраас хилчдийг дэргэдээс нь харж, ойлгож эхэлсэн. Ингээд том болоод амьдралын хэв маяг маань ч гэсэн хил, хилчид рүүгээ тэмүүлдэг болсон доо. Амралт, зугаалгаар Булган аймгийн Тэшиг суманд очиж хилчдийн амьдралын хэв маяг, тэдний сэтгэл, хийж байгаа ажлыг ойлгож, нөхөрлөхдөө хилчдийгээ хайрлах гүн мэдрэмж төрж билээ. Тиймдээ ч Монгол Улсын тусгаар тогтнол, нутаг дэвсгэрийн бүрэн бүтэн байдлыг сахин хамгаалж буй баатарлаг хилчдийнхээ ажил үйлсийг уран бүтээлдээ тусгахсан гэсэн бодлыг үргэлж тээж явдаг байлаа. Олон жил хил, хилчдээ бодож явсаар наймдугаар сард “Санан санах алс” дууг хилчдэдээ зориулж гаргасан. Хилчид маань олон хоног хилд үүрэг гүйцэтгэдэг шүү дээ. Энэ хугацаанд тэд эхнэр, хүүхдээ их санадаг байх. Энэ бүхнийг хилчин найзуудтайгаа ярилцсаны үндсэн дээр “Санан санах алс” гэдэг уран бүтээл мэндэлсэн. Энэ клипэнд хилчдийн амьдрал, дархан хилийн манаанд хэрхэн үүрэг гүйцэтгэж байгааг бодитоор харуулахыг хичээсэн. Тэр ч утгаараа ганган чамин зүйл нэмэлгүй яг байгаагаар нь гаргасан гэж хэлж болно. Баатарлаг хилчид улсынхаа хилийг ингэж манадаг юм шүү, ард иргэд бид хилчдийн хүчинд тусгаар тогтносон улсад амьдарч, эх орны хил тайван байгааг цаг үргэлж мэдэрдэг юм шүү гэдгийг дуугаараа илэрхийлэхийг зорьсон. “Санан санах алс” дууны клипийг үзвэл маш энгийн зүйлс гардаг. Хилчин найзууд маань их сайхан хүлээж авсан шүү. Энэхүү уран бүтээлд хилчин ах, эгч, найзууд маань бүгд оролцсон. Бид зураг авалтыг Хилийн цэргийн 0286 дугаар ангийн гурван салбарт хийсэн юм. Хүн бүрийн хичээл зүтгэлээр сайхан уран бүтээл төрлөө. “Эх орны манаа” сониноор дамжуулан Хилийн цэргийн 0286 дугаар ангийн хамт олонд маш их баярлалаа гэж хэлье. -Та 2011 онд Кино урлагийн дээд сургуулийг жүжигчний мэргэжлээр төгссөн юм билээ. Дуучин бус жүжигчин мэргэжлийг яагаад сонгох болов? -Хүүхэд байхаасаа л дуучин болох хүсэлтэй, түүнийхээ төлөө явдаг байлаа. Дуу хөгжимтэй нөхөрлөсөн минь гэр бүлийн хүмүүжилтэй холбоотой. Аав, ээж хоёр хоёулаа дуучин хүмүүс. Манай гэрээр дүүрэн ардын хөгжмийн зэмсэг өрөөстэй байдаг байлаа шүү дээ. Гэр бүлийн харилцаа, орчин, уур амьсгал бүхэн намайг дуулах мэдрэмжтэй болгож өсгөсөн. Харин жүжигчин болвол илүү их боломж нээгдэх болов уу гэдэг үүднээс мэргэжлээ сонгосон. Ирээдүйд дуучин болох зорилготой байсан учраас жүжигчин болж мэдрэмжээ илүү сайн илэрхийлэхийг зорьсон гэх үү дээ. Дуугаа амилуулах, дууныхаа утга, агуулгыг гаргахад жүжигчний мэргэжил маш их тус болдог.

-Таны аав, ээж хоёрын талаар болон төрж өссөн нутаг усных нь талаар ярилцлагаа үргэлжлүүлье?

-Миний аав, ээж хоёр хоёулаа Сүхбаатар аймгийн Дарьганга сумынх. Тэд гэр бүл болоод Дорнод аймагт суурьшсан юм. Би Дорнод аймгийн Чойбалсан хотод мэндэлсэн. Айлын таван хүүхдийн отгон нь. Төрсөн нутагтаа 18 нас хүртлээ сурч боловсроод 2007 онд хотод оюутан болж ирж байлаа. Миний аав МУСТА Лувсандоржийн Пүрэвжав, ээж Рагчаагийн Хоролмаа хоёр хоёулаа сайхан дуулдаг хүмүүс. Аав минь хуучнаар Сүхбаатарын Соёлын ордны дуучин байсан юм. Тэгээд сүүлд Дорнод аймгийн төвд суурьшиж багшаар ажилласан даа. Би аавынхаа дуртай зүйлийг залгамжилж яваадаа маш их баяртай байдаг шүү.

-Манай хилийн цэргийн анги, салбарууд таны хүүхэд ахуй үеийнхээс хэр өөрчлөгдсөн байна вэ?

-Өмнө нь хэлсэнчлэн би Хилийн цэргийн 0132 дугаар ангийн дугаар салбарт дөрвөн жил зуссан. Тухайн үед хүүхэд байсан болохоор цэргүүдтэй тоглож, наадаад л явдаг байлаа. Булган аймгийн Тэшиг сумын байгаль үнэхээр гоё шүү. Багаасаа харж өссөн хилийн цэрэг хэмээх айл өнөөдөр цоо шинэ түвшинд хүрсэн юм шиг санагддаг даа.

-Ингэхэд “Санан санах алс” уран бүтээлээс гадна хилчдэдээ зориулж дахиад дуу хийх бодол бий юу?

-“Санан санах алс” дуу бол хилчдэдээ зориулсан миний анхны уран бүтээл. Энэ дуугаа бүх хилчдэдээ хүргэх сэн гэж боддог. Хилчид маань энэ дууг дуулдаг байгаасай, мөн чанарыг нь илүү их мэдрээсэй. Та бүхэнд их л ойрхон дуу юм шүү.

-Уран бүтээлч хүн хийсэн уран бүтээлээсээ аз жаргал, таашаал мэдэрдэг гэдэг. Таны хувьд шинээр гаргасан бүтээлээсээ ямар мэдрэмж авдаг бол?

-Мэдээллийн технологи хөгжихийн хэрээр хүн өөрт төрсөн сэтгэгдлээ тухайн уран бүтээлчдээ чат, мессежээр илгээх боломжтой болжээ. Facebook, youtube-д нийтэлсэн дуунуудын дор сэтгэгдлээ илэрхийлж байна. Хүмүүсийн сэтгэгдлийг уншаад сайхан мэдрэмж авдаг. Мөн тоглолтын үеэр тайзан дээрээс хүмүүсийн нүд гэрэлтэж, сэтгэл уярч, алга ташиж байгааг хараад асар их кайф авдаг шүү. Дуу хийнэ гэдэг нь зөвхөн өнгө, нот бус мэдрэмж бүтээж байгаа хэрэг. Тэр мэдрэмж хүний зүрхэнд часхийтэл очиж байгааг мэдрэх нь миний зорилго.

-Таны хувьд анхны бие даасан уран бүтээлийн тоглолтоо 2019 онд “For you” нэртэйгээр толилуулж байсан. Энэ удаад хоёр дахь тоглолтын бэлтгэл ажил гээд өдөр хоногууд нэлээд завгүй өнгөрч байна уу?

-“Хайр эзэнтэй” амьд хөгжмийн тоглолтын маань бэлтгэл ажил хангагдаад ерөнхийдөө дуусаж байна. Хоёр дахь тоглолт эхний тоглолттой харьцуулшгүй том. Өмнө нь 3000 хүний өмнө дуулж байсан бол өдгөө 30 мянган хүний урд дуулах гэж байна. Энэ бол дэвшилтэд, шинэлэг зүйлийг үзүүлэх илүү их хариуцлага гэж бодож байна. Тоглолтод надтай хамт уран бүтээлүүд дээр ажиллаж, дуулж байсан уран бүтээлчид оролцоно. Тухайлбал, Motive, Crush Bash хамтлаг, дуучин Э.Агиймаа, Э.Дашням зэрэг уран бүтээлчид ирж, сонсогчидтойгоо хамт нэгэн үдшийг гайхалтай өнгөрүүлэх болно.

-Чамгүй урт хугацаа зарцуулж байж, үнэнч сонсогчдынхоо сонорыг мялаах бүтээл төрүүлдэг болов уу. Тэр ч утгаараа таны бүтээсэн дуунууд илүү их олон хүнд хүрдэг юм шиг ээ?

-Урлаг бол миний ажил, амьдрал, амралт, хобби байдаг. Би дууны үг зохиож, ая хийж байхдаа ажиллаж байна гэж огт боддоггүй. Би үргэлж дуугаа бодож, дууны үг, ая нийлүүлэн хийж, ихэнх цаг хугацаанд толгой дотор минь дуу л эргэлдэж байдаг /инээв/. Бүх дуундаа дуртай бас хайртай. Би чимээгүйхэн уран бүтээлээ хийсээр байгаа. Миний гаргасан уран бүтээлүүдээс хамгийн их хүч хөдөлмөр, цаг зав, энерги зарцуулж байж олон нийтийн хүртээл болгосон дуу гэвэл “Хайр эзэнтэй” дуу маань юм.

-Хувь хүнийхээ хувьд амьдралдаа ямар зарчим баримталдаг вэ?

-Би бүх зүйлд эерэг байхыг хичээдэг. Миний дуулж байгаа дуунууд хүртэл үргэлж сайн сайхан, инээд баясал, ертөнцийн хамгийн том сэдэв хайрын тухай өгүүлдэг. Би хар бараан зүйлийн эсрэг талд байж уран бүтээлүүдээ хийдэг. Хар бараан, муу муухай зүйлс хорвоогоор дүүрэн байна шүү дээ. Миний нэр П.Баярцэнгэл. Үзэгч, сонсогчдодоо хайрын тухай мэдрүүлж, баярлуулж, цэнгүүлэх нь миний үүрэг.

-Аав хүнийхээ үүргийг хэрхэн биелүүлдэг гэж боддог вэ?

-Би эцэг хүний хувьд төгс байхыг хичээдэг. Хүүхдүүдээ өдөр тутмын ажил, амьдралаасаа аз жаргалыг мэдэрч чаддаг хүн болгож өсгөхийг хүсдэг. Миний аав үргэлж “Зөв санаа, зөөлөн сэтгэл” гэж ярьдаг. Аавынхаа хэлж, зааж сургасан бүхнийг үр хүүхдүүддээ өвлүүлэхийг хичээдэг дээ.

-Хайрын тухай уран бүтээл хийхэд гэргийн тань нөлөө их байсан болов уу?

-Тэгэлгүй яах вэ. Одоогоос арван жилийн өмнө гаргасан “Санахдаа” дууг эхнэртээ зориулж зохиож байлаа. Ер нь эр хүн эхнэрээсээ л хүнийг хайрлах ухаанд суралцдаг юм шиг санагддаг. Хүнийг ингэж л ойлгож, хайрладаг юм байна, энэ чинь хайр юм байна шүү дээ гэж эхнэртэйгээ харилцаж байгаа харилцаа, мэдрэмжүүдээсээ аз жаргалыг хамгийн ихээр мэдэрдэг дээ. Би эхнэртээ хамгийн их итгэдэг. Тэр минь намайг шинээр бүтээсэн хүн.

-Цаг гарган ярилцсанд маш их баярлалаа. Таны тоглолт, цаашдын уран бүтээлд тань нийт хилчдийнхээ өмнөөс амжилт хүсье.

-Баярлалаа.